miyan zarur kami hai koi sitaron mein

miyāñ zarūr kamī hai koī sitāroñ meñ

hamārī haañ nahīñ aatī hai istiḳhāroñ meñ

vahāñ par ab hameñ nafrat se dekhā jaatā hai

jahāñ shumār hamārā thā jāñ-nisāroñ meñ

vo ab samajhte nahīñ haiñ zabāñ-kushā.ī bhī

jo pahle baat samajh lete the ishāroñ meñ

mu'āshre meñ jo haq mārte haiñ logoñ kā

shumār un kā bhī hotā hai dīn-dāroñ meñ

ḳhizāñ kī rut ko hamārā nasīb kar Daalā

hamīñ ko DhūñDne nikle haiñ ab bahāroñ meñ

vo log kaise saheñge 'azāb sahrā kā

jinhoñ ne 'umr guzārī ho ābshāroñ meñ

yahāñ pe koī nahīñ ab vafā-parast 'ādil'

shumār kis ko kareñ apne rāz-dāroñ meñ

miyan zarur kami hai koi sitaron mein

hamari han nahin aati hai istiKHaron mein

wahan par ab hamein nafrat se dekha jata hai

jahan shumar hamara tha jaan-nisaron mein

wo ab samajhte nahin hain zaban-kushai bhi

jo pahle baat samajh lete the ishaaron mein

mu'ashre mein jo haq marte hain logon ka

shumar un ka bhi hota hai din-daron mein

KHizan ki rut ko hamara nasib kar Dala

hamin ko DhunDne nikle hain ab bahaaron mein

wo log kaise sahenge 'azab sahra ka

jinhon ne 'umr guzari ho aabshaaron mein

yahan pe koi nahin ab wafa-parast 'adil'

shumar kis ko karen apne raaz-daron mein