udhaD jae jo ek baKHiya to haiat hi badal jae

udhaḌ jaa.e jo ik baḳhiya to hai.at hī badal jaa.e

libās-e-rishta-hā-e-ḳhūñ kī vaq'at hī badal jaa.e

musavvar hai vo aisā jis kī har taḳhlīq hai shahkār

zarā sā 'uzv yaañ se vaañ ho mūrat hī badal jaa.e

uThā.e ruḳh se āñchal to siyāhī shab kī chhaT jaa.e

haTā.e zulf to mah kī bhī qismat hī badal jaa.e

khuleñ gar qissa-hā-e-ḳhalvat-e-murshid murīdoñ par

nigāhoñ se vo gir jaa.eñ 'aqīdat hī badal jaa.e

'ajab hai kaifiyat apnī 'mudassir' muztarib hai dil

mile koī to phir andar kī hālat hī badal jaa.e

udhaD jae jo ek baKHiya to haiat hi badal jae

libas-e-rishta-ha-e-KHun ki waq'at hi badal jae

musawwar hai wo aisa jis ki har taKHliq hai shahkar

zara sa 'uzw yan se wan ho murat hi badal jae

uThae ruKH se aanchal to siyahi shab ki chhaT jae

haTae zulf to mah ki bhi qismat hi badal jae

khulen gar qissa-ha-e-KHalwat-e-murshid muridon par

nigahon se wo gir jaen 'aqidat hi badal jae

'ajab hai kaifiyat apni 'mudassir' muztarib hai dil

mile koi to phir andar ki haalat hi badal jae