sitam-e-na-rawa ko rote hain

sitam-e-nā-ravā ko rote haiñ

charḳh terī jafā ko rote haiñ

ḳhuun rulvā rahī hai yād-e-vafā

ik sarāpā-vafā ko rote haiñ

is tarah aa.ī vaqt se pahle

aane vaalī qazā ko rote haiñ

ab ye us tak pahuñch nahīñ saktā

nāla-e-nā-rasā ko rote haiñ

bah gayā aañkh se lahū ho kar

dil-e-dard-āshnā ko rote haiñ

jaan le kar gayā vo āḳhir-e-kār

maraz-e-lā-davā ko rote haiñ

jaane vaale kī ye nishānī hai

dekh kar naqsh-e-pā ko rote haiñ

dard sā dard hai bharā us meñ

TuuTe dil kī sadā ko rote haiñ

rote jo aa.e the rulā ke ga.e

ibtidā intihā ko rote haiñ

rañg-o-bū ab kahāñ vo gul hī nahīñ

is chaman kī havā ko rote haiñ

hai fazā-e-chaman ġhubār-ālūd

ham mukaddar fazā ko rote haiñ

ḳhaak meñ milne ko hai sab kā husn

gul-e-rañgīñ qabā ko rote haiñ

mehñdī pis kar lahū rulātī hai

pisne vaalī hinā ko rote haiñ

nafas-e-sard ye banī bhī to kyā

mauj-e-bād-e-sabā ko rote haiñ

bāġh-e-ālam meñ is tarah be-dīd

nagis-e-nīm-vā ko rote haiñ

chhā ga.ī kaisī tīrgī un par

mehr-o-mah kī ziyā ko rote haiñ

kaam aayā na ye kisī ke bhī

ḳhizr āb-e-baqā ko rote haiñ

chup haiñ yuuñ jaise in meñ jaan nahīñ

lab-e-mojiz-numā ko rote haiñ

ab sū-e-asmāñ nahīñ uThtā

apne dast-e-duā ko rote haiñ

jaan ko le ke saath jaanā thā

is dil-e-mubtalā ko rote haiñ

de gayā dāġh-e-ġham ye kaun 'riyāz'

ham ġham-e-der-pā ko rote haiñ

sitam-e-na-rawa ko rote hain

charKH teri jafa ko rote hain

KHun rulwa rahi hai yaad-e-wafa

ek sarapa-wafa ko rote hain

is tarah aai waqt se pahle

aane wali qaza ko rote hain

ab ye us tak pahunch nahin sakta

nala-e-na-rasa ko rote hain

bah gaya aankh se lahu ho kar

dil-e-dard-ashna ko rote hain

jaan le kar gaya wo aaKHir-e-kar

maraz-e-la-dawa ko rote hain

jaane wale ki ye nishani hai

dekh kar naqsh-e-pa ko rote hain

dard sa dard hai bhara us mein

TuTe dil ki sada ko rote hain

rote jo aae the rula ke gae

ibtida intiha ko rote hain

rang-o-bu ab kahan wo gul hi nahin

is chaman ki hawa ko rote hain

hai faza-e-chaman ghubar-alud

hum mukaddar faza ko rote hain

KHak mein milne ko hai sab ka husn

gul-e-rangin qaba ko rote hain

mehndi pis kar lahu rulati hai

pisne wali hina ko rote hain

nafas-e-sard ye bani bhi to kya

mauj-e-baad-e-saba ko rote hain

bagh-e-alam mein is tarah be-did

nagis-e-nim-wa ko rote hain

chha gai kaisi tirgi un par

mehr-o-mah ki ziya ko rote hain

kaam aaya na ye kisi ke bhi

KHizr aab-e-baqa ko rote hain

chup hain yun jaise in mein jaan nahin

lab-e-mojiz-numa ko rote hain

ab su-e-asman nahin uThta

apne dast-e-dua ko rote hain

jaan ko le ke sath jaana tha

is dil-e-mubtala ko rote hain

de gaya dagh-e-gham ye kaun 'riyaz'

hum gham-e-der-pa ko rote hain