sitam-e-kaamyab ne mara

sitam-e-kāmyāb ne maarā

karam-e-lā-javāb ne maarā

ḳhud huī gum hameñ bhī kho baiThī

nigah-e-bāzyāb ne maarā

zindagī thī hijāb ke dam tak

barhami-e-hijāb ne maarā

ishq ke har sukūn-e-āḳhir ko

husn ke iztirāb ne maarā

ḳhud nazar ban ga.ī hijāb-e-nazar

haa.e us be-hijāb ne maarā

maiñ tirā aks huuñ ki tū merā

is savāl-o-javāb ne maarā

koī pūchhe ki rah ke pahlū meñ

tiir kyā iztirāb ne maarā

bach rahā jo tirī tajallī se

us ko tere hijāb ne maarā

ab nazar ko kahīñ qarār nahīñ

kāvish-e-intiḳhāb ne maarā

sab ko maarā 'jigar' ke sheroñ ne

aur 'jigar' ko sharāb ne maarā

sitam-e-kaamyab ne mara

karam-e-la-jawab ne mara

KHud hui gum hamein bhi kho baiThi

nigah-e-bazyab ne mara

zindagi thi hijab ke dam tak

barhami-e-hijab ne mara

ishq ke har sukun-e-aKHir ko

husn ke iztirab ne mara

KHud nazar ban gai hijab-e-nazar

hae us be-hijab ne mara

main tera aks hun ki tu mera

is sawal-o-jawab ne mara

koi puchhe ki rah ke pahlu mein

tir kya iztirab ne mara

bach raha jo teri tajalli se

us ko tere hijab ne mara

ab nazar ko kahin qarar nahin

kawish-e-intiKHab ne mara

sab ko mara 'jigar' ke sheron ne

aur 'jigar' ko sharab ne mara