sitara-saz ye hum par karam farmate rahte hain

sitārā-sāz ye ham par karam farmāte rahte haiñ

añdherī raat meñ jugnū sā kuchh chamkāte rahte haiñ

sunā hai shor se hal hoñge saare mas.ale ik din

so ham āvāz ko āvāz se Takrāte rahte haiñ

jahāñ meñ amn kaise phailtā hai kaise phailegā

vo sab ko tiir se talvār se samjhāte rahte haiñ

ye kaisī bhiiḌ mere gird hai ghabrā gayā huuñ maiñ

tamāsha dekhne vaale to aate jaate rahte haiñ

baḌā dilchasp kārobār ab ke saal chal niklā

havas ke ā.īne ko ishq se chamkāte rahte haiñ

isī duniyā se dīvāreñ uThānā ham ne sīkhā hai

ham is duniyā ko har dīvār se Takrāte rahte haiñ

sitara-saz ye hum par karam farmate rahte hain

andheri raat mein jugnu sa kuchh chamkate rahte hain

suna hai shor se hal honge sare masale ek din

so hum aawaz ko aawaz se Takraate rahte hain

jahan mein amn kaise phailta hai kaise phailega

wo sab ko tir se talwar se samjhate rahte hain

ye kaisi bhiD mere gird hai ghabra gaya hun main

tamasha dekhne wale to aate jate rahte hain

baDa dilchasp karobar ab ke sal chal nikla

hawas ke aaine ko ishq se chamkate rahte hain

isi duniya se diwaren uThana hum ne sikha hai

hum is duniya ko har diwar se Takraate rahte hain