sina-o-dil hasraton se chha gaya

sīna-o-dil hasratoñ se chhā gayā

bas hujūm-e-yās jī ghabrā gayā

tujh se kuchh dekhā na ham ne juz jafā

par vo kyā kuchh hai ki jī ko bhā gayā

khul nahīñ saktī haiñ ab āñkheñ mirī

jī meñ ye kis kā tasavvur aa gayā

maiñ to kuchh zāhir na kī thī jī kī baat

par mirī nazroñ ke Dhab se pā gayā

pī ga.ī kitnoñ kā lohū terī yaad

ġham tirā kitne kaleje khā gayā

miT ga.ī thī us ke jī se to jhichak

'dard' kuchh kuchh bak ke tū chauñkā gayā

sina-o-dil hasraton se chha gaya

bas hujum-e-yas ji ghabra gaya

tujh se kuchh dekha na hum ne juz jafa

par wo kya kuchh hai ki ji ko bha gaya

khul nahin sakti hain ab aankhen meri

ji mein ye kis ka tasawwur aa gaya

main to kuchh zahir na ki thi ji ki baat

par meri nazron ke Dhab se pa gaya

pi gai kitnon ka lohu teri yaad

gham tera kitne kaleje kha gaya

miT gai thi us ke ji se to jhichak

'dard' kuchh kuchh bak ke tu chaunka gaya