ab to shahron se KHabar aati hai diwanon ki

ab to shahroñ se ḳhabar aatī hai dīvānoñ kī

koī pahchān hī baaqī nahīñ vīrānoñ kī

apnī poshāk se hushyār ki ḳhuddām-e-qadīm

dhajjiyāñ māñgte haiñ apne garebānoñ kī

san.ateñ phailtī jaatī haiñ magar is ke saath

sarhadeñ TūTtī jaatī haiñ gulistānoñ kī

dil meñ vo zaḳhm khile haiñ ki chaman kyā shai hai

ghar meñ bārāt sī utrī huī gul-dānoñ kī

un ko kyā fikr ki maiñ paar lagā yā Duubā

bahs karte rahe sāhil pe jo tūfānoñ kī

terī rahmat to musallam hai magar ye to batā

kaun bijlī ko ḳhabar detā hai kāshānoñ kī

maqbare bante haiñ zindoñ ke makānoñ se buland

kis qadar auj pe takrīm hai insānoñ kī

ek ik yaad ke hāthoñ pe charāġhoñ bhare tasht

ka.aba-e-dil kī fazā hai ki sanam-ḳhānoñ kī

ab to shahron se KHabar aati hai diwanon ki

koi pahchan hi baqi nahin viranon ki

apni poshak se hushyar ki KHuddam-e-qadim

dhajjiyan mangte hain apne garebanon ki

sanaten phailti jati hain magar is ke sath

sarhaden TuTti jati hain gulistanon ki

dil mein wo zaKHm khile hain ki chaman kya shai hai

ghar mein baraat si utri hui gul-danon ki

un ko kya fikr ki main par laga ya Duba

bahs karte rahe sahil pe jo tufanon ki

teri rahmat to musallam hai magar ye to bata

kaun bijli ko KHabar deta hai kashanon ki

maqbare bante hain zindon ke makanon se buland

kis qadar auj pe takrim hai insanon ki

ek ek yaad ke hathon pe charaghon bhare tasht

kaba-e-dil ki faza hai ki sanam-KHanon ki