hazaron lakhon dilli mein makan hain

hazāroñ lākhoñ dillī meñ makāñ haiñ

magar pahchānñe vaale kahāñ haiñ

kahīñ par silsila hai koThiyoñ kā

kahīñ girte khañDar haiñ nāliyāñ haiñ

kahīñ hañstī chamaktī sūrateñ haiñ

kahīñ miTtī huī parchhā.iyāñ haiñ

kahīñ āvāz ke parde paḌe haiñ

kahīñ chup meñ ka.ī sargoshiyāñ haiñ

qutub-sāhib khaḌe haiñ sar jhukā.e

qile par gidh bahut hī shādmāñ haiñ

are ye kaun sī saḌkeñ haiñ bhaa.ī

yahāñ to laḌkiyāñ hī laḌkiyāñ haiñ

likhā miltā hai dīvāroñ pe ab bhī

to kyā ab bhī vahī bīmāriyāñ haiñ

havāloñ par havāle de rahe haiñ

ye sāhab to kitāboñ kī dukāñ haiñ

mire aage mujhī ko koste haiñ

magar kyā kījiye ahl-e-zabāñ haiñ

dikhāyā ek hī dillī ne kyā kyā

burā ho ab to do do dilliyāñ haiñ

yahāñ bhī dost mil jaate haiñ 'alvī'

yahāñ bhī dostoñ meñ talḳhiyāñ haiñ

hazaron lakhon dilli mein makan hain

magar pahchanne wale kahan hain

kahin par silsila hai koThiyon ka

kahin girte khanDar hain naliyan hain

kahin hansti chamakti suraten hain

kahin miTti hui parchhaiyan hain

kahin aawaz ke parde paDe hain

kahin chup mein kai sargoshiyan hain

qutub-sahib khaDe hain sar jhukae

qile par gidh bahut hi shadman hain

are ye kaun si saDken hain bhai

yahan to laDkiyan hi laDkiyan hain

likha milta hai diwaron pe ab bhi

to kya ab bhi wahi bimariyan hain

hawalon par hawale de rahe hain

ye sahab to kitabon ki dukan hain

mere aage mujhi ko koste hain

magar kya kijiye ahl-e-zaban hain

dikhaya ek hi dilli ne kya kya

bura ho ab to do do dilliyan hain

yahan bhi dost mil jate hain 'alwi'

yahan bhi doston mein talKHiyan hain