ye saqi ki karamat hai ki faiz-e-mai-parasti hai

ye saaqī kī karāmat hai ki faiz-e-mai-parastī hai

ghaTā ke bhes meñ mai-ḳhāne par rahmat barastī hai

ye jo kuchh dekhte haiñ ham fareb-e-ḳhvāb-e-hastī hai

taḳhayyul ke karishme haiñ bulandī hai na pastī hai

vahāñ haiñ ham jahāñ 'bedam' na vīrāna na bastī hai

na pābandī na āzādī na hushyārī na mastī hai

tirī nazroñ pe chaḌhnā aur tire dil se utar jaanā

mohabbat meñ bulandī jis ko kahte haiñ vo pastī hai

vahī ham the kabhī jo raat din phūloñ meñ tulte the

vahī ham haiñ ki turbat chaar phūloñ ko tarastī hai

karishme haiñ ki naqqāsh-e-azal nairañgiyāñ terī

jahāñ meñ mā.il-e-rang-e-fanā har naqsh-e-hastī hai

ise bhī nāvak-e-jānāñ tū apne saath letā jā

ki merī aarzū dil se nikalne ko tarastī hai

har ik zarre meñ hai innī-inallah kī sadā saaqī

'ajab mai-kash the jin kī ḳhaak meñ bhī josh-e-mastī hai

ḳhudā rakkhe dil-e-pur-soz terī sho.ala-afshānī

ki tū vo sham' hai jo raunaq-e-darbār-e-hastī hai

mire dil ke sivā tū ne bhī dekhī bekasī merī

ki ābādī na ho jis meñ koī aisī bhī bastī hai

hijābāt-e-ta.ayyun māne-e-dīdār samjhā thā

jo dekhā to naqāb-e-rū-e-jānāñ merī hastī hai

'ajab duniyā-e-hairat ālam-e-gor-e-ġharībāñ hai

ki vīrāne kā vīrāna hai aur bastī kī bastī hai

kahīñ hai abd kī dhun aur kahīñ shor-e-anal-haq hai

kahīñ iḳhfā-e-mastī hai kahīñ iz.hār-e-mastī hai

banāyā rashk-e-mehr-o-mah tirī zarra-navāzī ne

nahīñ to kyā hai 'bedam' aur kyā 'bedam' kī hastī hai

ye saqi ki karamat hai ki faiz-e-mai-parasti hai

ghaTa ke bhes mein mai-KHane par rahmat barasti hai

ye jo kuchh dekhte hain hum fareb-e-KHwab-e-hasti hai

taKHayyul ke karishme hain bulandi hai na pasti hai

wahan hain hum jahan 'bedam' na virana na basti hai

na pabandi na aazadi na hushyari na masti hai

teri nazron pe chaDhna aur tere dil se utar jaana

mohabbat mein bulandi jis ko kahte hain wo pasti hai

wahi hum the kabhi jo raat din phulon mein tulte the

wahi hum hain ki turbat chaar phulon ko tarasti hai

karishme hain ki naqqash-e-azal nairangiyan teri

jahan mein mail-e-rang-e-fana har naqsh-e-hasti hai

ise bhi nawak-e-jaanan tu apne sath leta ja

ki meri aarzu dil se nikalne ko tarasti hai

har ek zarre mein hai inni-inallah ki sada saqi

'ajab mai-kash the jin ki KHak mein bhi josh-e-masti hai

KHuda rakkhe dil-e-pur-soz teri shoala-afshani

ki tu wo sham' hai jo raunaq-e-darbar-e-hasti hai

mere dil ke siwa tu ne bhi dekhi bekasi meri

ki aabaadi na ho jis mein koi aisi bhi basti hai

hijabaat-e-tayyun mane-e-didar samjha tha

jo dekha to naqab-e-ru-e-jaanan meri hasti hai

'ajab duniya-e-hairat aalam-e-gor-e-ghariban hai

ki virane ka virana hai aur basti ki basti hai

kahin hai abd ki dhun aur kahin shor-e-anal-haq hai

kahin iKHfa-e-masti hai kahin izhaar-e-masti hai

banaya rashk-e-mehr-o-mah teri zarra-nawazi ne

nahin to kya hai 'bedam' aur kya 'bedam' ki hasti hai