rahat na mil saki mujhe mai-KHana chhoD kar

rāhat na mil sakī mujhe mai-ḳhāna chhoḌ kar

gardish meñ huuñ maiñ gardish-e-paimāna chhoḌ kar

ḳhum meñ subū meñ jaam meñ niyyat lagī rahī

mai-ḳhāne hī meñ ham rahe mai-ḳhāna chhoḌ kar

āñkhoñ ko chhoḌ jā.ūñ ilāhī maiñ kyā karūñ

haTtī nahīñ nazar ruḳh-e-jānāna chhoḌ kar

aatā hai jī meñ sāqi-e-mah-vash pe baar baar

lab chuum luuñ tirā lab-e-paimāna chhoḌ kar

hotī kahāñ hai dil se judā dil kī aarzū

jaatā kahāñ hai sham.a ko parvāna chhoḌ kar

do ghūñT ne baḌhā diye rindoñ ke hausle

miinā o ḳhum pe jhuk paḌe paimāna chhoḌ kar

phir bū-e-zulf-e-yār ne aa kar sitam kiyā

phir chal diyā mujhe dil-e-dīvāna chhoḌ kar

yaad aa.ī kis kī aañkh ki riñd uTh khaḌe hue

paimāna toḌ kar mai o mai-ḳhāna chhoḌ kar

duniyā meñ āfiyat kī jagah hai yahī 'jalīl'

jaanā kahīñ na gosha-e-mai-ḳhāna chhoḌ kar

rahat na mil saki mujhe mai-KHana chhoD kar

gardish mein hun main gardish-e-paimana chhoD kar

KHum mein subu mein jam mein niyyat lagi rahi

mai-KHane hi mein hum rahe mai-KHana chhoD kar

aankhon ko chhoD jaun ilahi main kya karun

haTti nahin nazar ruKH-e-jaanana chhoD kar

aata hai ji mein saqi-e-mah-wash pe bar bar

lab chum lun tera lab-e-paimana chhoD kar

hoti kahan hai dil se juda dil ki aarzu

jata kahan hai shama ko parwana chhoD kar

do ghunT ne baDha diye rindon ke hausle

mina o KHum pe jhuk paDe paimana chhoD kar

phir bu-e-zulf-e-yar ne aa kar sitam kiya

phir chal diya mujhe dil-e-diwana chhoD kar

yaad aai kis ki aankh ki rind uTh khaDe hue

paimana toD kar mai o mai-KHana chhoD kar

duniya mein aafiyat ki jagah hai yahi 'jalil'

jaana kahin na gosha-e-mai-KHana chhoD kar