kal humne bazm-e-yar mein kya kya sharab pi

kal ham ne bazm-e-yār meñ kyā kyā sharāb pī

sahrā kī tishnagī thī so dariyā sharāb pī

apnoñ ne taj diyā hai to ġhairoñ meñ jā ke baiTh

ai ḳhānumāñ-ḳharāb na tanhā sharāb pī

tū ham-safar nahīñ hai to kyā sair-e-gulsitāñ

to ham-subū nahīñ hai to phir kyā sharāb pī

ai dil-girafta-e-ġham-e-jānāñ subū uThā

ai kushta-e-jafā-e-zamāna sharāb pī

ik mehrbāñ buzurg ne ye mashvara diyā

dukh kā koī 'ilāj nahīñ jā sharāb pī

bādal garaj rahā thā idhar mohtasib udhar

phir jab talak ye uqda na suljhā sharāb pī

ai tū ki tere dar pe haiñ rindoñ ke jamghaTe

ik roz us faqīr ke ghar aa sharāb pī

do jaam un ke naam bhī ai pīr-e-mai-kada

jin raftagāñ ke saath hamesha sharāb pī

kal ham se apnā yaar ḳhafā ho gayā 'farāz'

shāyad ki ham ne had se ziyāda sharāb pī

kal hum ne bazm-e-yar mein kya kya sharab pi

sahra ki tishnagi thi so dariya sharab pi

apnon ne taj diya hai to ghairon mein ja ke baiTh

ai KHanuman-KHarab na tanha sharab pi

tu ham-safar nahin hai to kya sair-e-gulsitan

to ham-subu nahin hai to phir kya sharab pi

ai dil-girafta-e-gham-e-jaanan subu uTha

ai kushta-e-jafa-e-zamana sharab pi

ek mehrban buzurg ne ye mashwara diya

dukh ka koi 'ilaj nahin ja sharab pi

baadal garaj raha tha idhar mohtasib udhar

phir jab talak ye uqda na suljha sharab pi

ai tu ki tere dar pe hain rindon ke jamghaTe

ek roz us faqir ke ghar aa sharab pi

do jam un ke nam bhi ai pir-e-mai-kada

jin raftagan ke sath hamesha sharab pi

kal hum se apna yar KHafa ho gaya 'faraaz'

shayad ki hum ne had se ziyaada sharab pi