shab kis se ye hum juda rahe hain

shab kis se ye ham judā rahe haiñ

tā sub.h nipaT ḳhafā rahe haiñ

aanā hai to aa vagarna pyāre

ham aap se aaj jā rahe haiñ

baiTheñ pas-e-kār-e-ḳhvesh kyūñ-kar

jo naaz tire uThā rahe haiñ

vīrāne se mere Dar na ai chuġhad

ik vaqt to yaañ humā rahe haiñ

ai hastī tū khīñch naqsh-e-bātil

ham haiñ to ise miTā rahe haiñ

phir āzim-e-girya huuñ ki tūfāñ

juuñ abr nazar meñ chhā rahe haiñ

ronā hai agar yahī to 'qā.em'

ik ḳhalq ko ham Dubā rahe haiñ

shab kis se ye hum juda rahe hain

ta subh nipaT KHafa rahe hain

aana hai to aa wagarna pyare

hum aap se aaj ja rahe hain

baiThen pas-e-kar-e-KHwesh kyun-kar

jo naz tere uTha rahe hain

virane se mere Dar na ai chughad

ek waqt to yan huma rahe hain

ai hasti tu khinch naqsh-e-baatil

hum hain to ise miTa rahe hain

phir aazim-e-girya hun ki tufan

jun abr nazar mein chha rahe hain

rona hai agar yahi to 'qaem'

ek KHalq ko hum Duba rahe hain