shab-e-hijr mein yaad aana kisi ka

shab-e-hijr meñ yaad aanā kisī kā

satā.e hue ko satānā kisī kā

kabhī pyaar kī bāteñ vo chupke chupke

kabhī naaz se ruuTh jaanā kisī kā

vo bholī adā.eñ na kyuuñ yaad aa.eñ

laḌakpan meñ thā kyā zamāna kisī kā

kabhī thī vo ġhusse kī chitvan qayāmat

kabhī ājizī se manānā kisī kā

vo dil ban ke dām-e-mohabbat meñ aayā

ki zulfoñ meñ thā āshiyānā kisī kā

nazar lag ga.ī mere dushman kī mujh ko

qayāmat huā ruuTh jaanā kisī kā

khilā.egā gul rañg lā.egā ai 'shād'

tujhe dekh kar muskurānā kisī kā

shab-e-hijr mein yaad aana kisi ka

satae hue ko satana kisi ka

kabhi pyar ki baaten wo chupke chupke

kabhi naz se ruTh jaana kisi ka

wo bholi adaen na kyun yaad aaen

laDakpan mein tha kya zamana kisi ka

kabhi thi wo ghusse ki chitwan qayamat

kabhi aajizi se manana kisi ka

wo dil ban ke dam-e-mohabbat mein aaya

ki zulfon mein tha aashiyana kisi ka

nazar lag gai mere dushman ki mujh ko

qayamat hua ruTh jaana kisi ka

khilaega gul rang laega ai 'shad'

tujhe dekh kar muskurana kisi ka