sayyad tumhaare gham ki kisi ko KHabar nahin

'sayyad' tumhāre ġham kī kisī ko ḳhabar nahīñ

ho bhī ḳhabar kisī ko to samjho ḳhabar nahīñ

maujūd ho to kis liye mafqūd ho ga.e

kin jañgaloñ meñ jā ke base ho ḳhabar nahīñ

itnī ḳhabar hai phuul se ḳhushbū judā huī

us ko kahīñ se DhūñDh ke laao ḳhabar nahīñ

dil meñ ubal rahe haiñ vo tūfāñ ki al-amāñ

chehre pe vo sukūn hai maano ḳhabar nahīñ

dekho to har baġhal meñ hai daftar dabā huā

aḳhbār meñ jo chhāpnā chāho ḳhabar nahīñ

nok-e-zabāñ haiñ tum ko sharāboñ ke naam sab

lekin nashe kī bāda-parasto ḳhabar nahīñ

kāġhaz zamīn-e-shor qalam shāḳh-e-be-samar

kis aarzū pe umr guzāro ḳhabar nahīñ

'sayyad' koī to ḳhvāb bhī tasnīf kījiye

har baar tum yahī na sunāo ḳhabar nahīñ

'sayyad' tumhaare gham ki kisi ko KHabar nahin

ho bhi KHabar kisi ko to samjho KHabar nahin

maujud ho to kis liye mafqud ho gae

kin jangalon mein ja ke base ho KHabar nahin

itni KHabar hai phul se KHushbu juda hui

us ko kahin se DhunDh ke lao KHabar nahin

dil mein ubal rahe hain wo tufan ki al-aman

chehre pe wo sukun hai mano KHabar nahin

dekho to har baghal mein hai daftar daba hua

aKHbar mein jo chhapna chaho KHabar nahin

nok-e-zaban hain tum ko sharabon ke nam sab

lekin nashe ki baada-parasto KHabar nahin

kaghaz zamin-e-shor qalam shaKH-e-be-samar

kis aarzu pe umr guzaro KHabar nahin

'sayyad' koi to KHwab bhi tasnif kijiye

har bar tum yahi na sunao KHabar nahin