zulf-e-nazzara saz-e-manzar-e-sham

zulf-e-nazzāra sāz-e-manzar-e-shām

chhab tirī aur māhtāb kā naam

'ishq meñ ai dil itnī māyūsī

tā.ir-e-'azm aur yuuñ tah-e-dām

is qadar be-tavajjohī na barat

do ghaḌī hai musāfiroñ kā qayām

yād-e-ayyām vo zamāna-e-'umr

rābtoñ ke vo yādgār ayyām

sohbatoñ kī jihat jihat vaq'at

qahqahoñ ke 'alam ḳhiyām ḳhiyām

vālihāna hayāt kā 'ālam

ḳhud-numāyāna ḳhush ḳhavās-o-'avām

nau-ba-nau us ke ang ang kā rang

lāla-ruḳh gul-jabīñ saman-andām

us ke andāz le uḌī hai sabā

mauj-dar-mauj usī kī naql-e-ḳhirām

tishnagī kā savāl rind-ba-rind

qaht-e-mai kā ḳhayāl jām-ba-jām

justujū shart hai ravish-ba-ravish

manziloñ ke nishāñ haiñ gām-ba-gām

talab-āmāda dil rahe 'gauhar'

husn aa.e hī aa.e ab sar-e-bām

moḌ phir raḳhsh-e-fikr usī jānib

tā na aa.e gurez kā ilzām

vo dikhātā rahā hunar kī bahār

be-niyāz-e-satā.ish-o-in'ām

lutf-e-tafsīl iḳhtisār us kā

husn-e-ījāz us kā tūl-e-kalām

jān-e-pechīdgī hai sahl us kā

us ke iblāġh kā sharaf ib.hām

'ġhālib'-e-nāmvar ke naam pe kar

mad.h ke ehtimām kā itmām

daftar-e-shauq ke varaq to uThā

sar ḳhamīda paḌe qalam ko to thaam

'ijz-e-iz.hār kī pukār to sun

zikr-e-be-chārgī to kar sar-e-'ām

mad.h-e-sāhil huā safīna-e-mad.h

nek āġhāz nek-tar anjām

maiñ faromāya-o-faro-mansab

vo girāñ-'izzat-o-girāñ-ikrām

us kā halqa-ba-gosh huuñ varna

zar-e-ḳhālis se rishta-e-mis-e-ḳhām

zulf-e-nazzara saz-e-manzar-e-sham

chhab teri aur mahtab ka nam

'ishq mein ai dil itni mayusi

tair-e-'azm aur yun tah-e-dam

is qadar be-tawajjohi na barat

do ghaDi hai musafiron ka qayam

yaad-e-ayyam wo zamana-e-'umr

rabton ke wo yaadgar ayyam

sohbaton ki jihat jihat waq'at

qahqahon ke 'alam KHiyam KHiyam

walihana hayat ka 'alam

KHud-numayana KHush KHawas-o-'awam

nau-ba-nau us ke ang ang ka rang

lala-ruKH gul-jabin saman-andam

us ke andaz le uDi hai saba

mauj-dar-mauj usi ki naql-e-KHiram

tishnagi ka sawal rind-ba-rind

qaht-e-mai ka KHayal jam-ba-jam

justuju shart hai rawish-ba-rawish

manzilon ke nishan hain gam-ba-gam

talab-amada dil rahe 'gauhar'

husn aae hi aae ab sar-e-baam

moD phir raKHsh-e-fikr usi jaanib

ta na aae gurez ka ilzam

wo dikhata raha hunar ki bahaar

be-niyaz-e-sataish-o-in'am

lutf-e-tafsil iKHtisar us ka

husn-e-ijaz us ka tul-e-kalam

jaan-e-pechidgi hai sahl us ka

us ke iblagh ka sharaf ibham

'ghaalib'-e-namwar ke nam pe kar

madh ke ehtimam ka itmam

daftar-e-shauq ke waraq to uTha

sar KHamida paDe qalam ko to tham

'ijz-e-izhaar ki pukar to sun

zikr-e-be-chaargi to kar sar-e-'am

madh-e-sahil hua safina-e-madh

nek aaghaz nek-tar anjam

main faromaya-o-faro-mansab

wo giran-'izzat-o-giran-ikram

us ka halqa-ba-gosh hun warna

zar-e-KHalis se rishta-e-mis-e-KHam