kaf-e-habab kabhi sail-e-ab ki surat

kaf-e-habāb kabhī sail-e-āb kī sūrat

har ek pal huuñ ravāñ pech-o-tāb kī sūrat

had-e-nazar meñ musalsal hisār-e-sahrā hai

ḳhat-e-safar hai numāyāñ sarāb kī sūrat

khulā huuñ abr-e-siyah meñ dar-e-shafaq kī tarah

chamak rahā huuñ rag-e-āftāb kī sūrat

baḌe ġhurūr se niklā huuñ dām-e-sar-sar se

sar-e-nazāra khilā huuñ gulāb kī sūrat

utar gayā huuñ nigāhoñ meñ āb-e-ġham le kar

diloñ meñ phirtā huuñ maiñ iztirāb kī sūrat

badan ki tundī-e-ḳhūñ se huā hai shal merā

khiñchī huī hai har ik rag tanāb kī sūrat

huī hai barhana lauh-e-badan pe har ḳhvāhish

khulā huā huuñ har ik par kitāb kī sūrat

jo us ko dekhā to tasvīr ban ga.iiñ āñkheñ

vo mujh pe taarī huā sehr-e-ḳhvāb kī sūrat

tamām jism ravāñ ek jū-e-mast meñ hai

koī phire hai ragoñ meñ sharāb kī sūrat

kamāl-e-she’r-o-suḳhan rā.egāñ hai ab 'sarmad'

nikāl koī yahāñ inqilāb kī sūrat

kaf-e-habab kabhi sail-e-ab ki surat

har ek pal hun rawan pech-o-tab ki surat

had-e-nazar mein musalsal hisar-e-sahra hai

KHat-e-safar hai numayan sarab ki surat

khula hun abr-e-siyah mein dar-e-shafaq ki tarah

chamak raha hun rag-e-aftab ki surat

baDe ghurur se nikla hun dam-e-sar-sar se

sar-e-nazara khila hun gulab ki surat

utar gaya hun nigahon mein aab-e-gham le kar

dilon mein phirta hun main iztirab ki surat

badan ki tundi-e-KHun se hua hai shal mera

khinchi hui hai har ek rag tanab ki surat

hui hai barhana lauh-e-badan pe har KHwahish

khula hua hun har ek par kitab ki surat

jo us ko dekha to taswir ban gain aankhen

wo mujh pe tari hua sehr-e-KHwab ki surat

tamam jism rawan ek ju-e-mast mein hai

koi phire hai ragon mein sharab ki surat

kamal-e-she’r-o-suKHan raegan hai ab 'sarmad'

nikal koi yahan inqilab ki surat