sar-e-mahshar yahi puchhunga KHuda se pahle

sar-e-mahshar yahī pūchhūñgā ḳhudā se pahle

tū ne rokā bhī thā bande ko ḳhatā se pahle

ashk āñkhoñ meñ haiñ hoñToñ pe bukā se pahle

qāfila ġham kā chalā bāñg-e-darā se pahle

haañ yahī dil jo kisī kā hai ab ā.īna-e-husn

varaq-e-sāda thā ulfat kī jilā se pahle

ibtidā hī se na de ziist mujhe dars is kā

aur bhī baab to haiñ bāb-e-razā se pahle

maiñ girā ḳhaak pe lekin kabhī tum ne sochā

mujh pe kyā biit ga.ī laġhzish-e-pā se pahle

ashk aate to the lekin ye chamak aur taḌap

in meñ kab thī ġham-e-ulfat kī jilā se pahle

dar-e-mai-ḳhāna se aatī hai sadā-e-sāqī

aaj sairāb kiye jā.eñge pyāse pahle

rāz-e-mai-noshi-e-'mullā' huā ifshā varna

samjhā jaatā thā valī laġhzish-e-pā se pahle

sar-e-mahshar yahi puchhunga KHuda se pahle

tu ne roka bhi tha bande ko KHata se pahle

ashk aankhon mein hain honTon pe buka se pahle

qafila gham ka chala bang-e-dara se pahle

han yahi dil jo kisi ka hai ab aaina-e-husn

waraq-e-sada tha ulfat ki jila se pahle

ibtida hi se na de zist mujhe dars is ka

aur bhi bab to hain bab-e-raza se pahle

main gira KHak pe lekin kabhi tum ne socha

mujh pe kya bit gai laghzish-e-pa se pahle

ashk aate to the lekin ye chamak aur taDap

in mein kab thi gham-e-ulfat ki jila se pahle

dar-e-mai-KHana se aati hai sada-e-saqi

aaj sairab kiye jaenge pyase pahle

raaz-e-mai-noshi-e-'mulla' hua ifsha warna

samjha jata tha wali laghzish-e-pa se pahle