nazar badal ke hamari jaanib jab usne dekha to log samjhe

nazar badal ke hamārī jānib jab us ne dekhā to log samjhe

mohabbatoñ kā hasīn rishta jo pal meñ TuuTā to log samjhe

jahālatoñ kā dil-o-nazar se ġhubār utrā to log samjhe

ki haiñ qayāmat ke ye nazāre zamīr jaagā to log samjhe

samajh rahe the ki maiñ samundar kī tez maujoñ meñ bah rahā huuñ

ki sat.h-e-sāhil pe der tak bhī jo maiñ na ubhrā to log samjhe

kisī ko pahle ḳhabar nahīñ thī ki rishta kaisā hai merā us se

vo mere pahlū meñ jab achānak hī aa ke baiThā to log samjhe

kahāñ pata thā kisī ko kuchh bhī ki kaisā kirdār hai hamārā

jab apne andar kī ḳhāmiyoñ ko hamīñ ne samjhā to log samjhe

samajh na paayā koī bhī 'najmī' jo baat narmī se kī hai maiñ ne

buland āvāz apnī kar ke maiñ jab bhī bolā to log samjhe

nazar badal ke hamari jaanib jab us ne dekha to log samjhe

mohabbaton ka hasin rishta jo pal mein TuTa to log samjhe

jahaalaton ka dil-o-nazar se ghubar utra to log samjhe

ki hain qayamat ke ye nazare zamir jaga to log samjhe

samajh rahe the ki main samundar ki tez maujon mein bah raha hun

ki sath-e-sahil pe der tak bhi jo main na ubhra to log samjhe

kisi ko pahle KHabar nahin thi ki rishta kaisa hai mera us se

wo mere pahlu mein jab achanak hi aa ke baiTha to log samjhe

kahan pata tha kisi ko kuchh bhi ki kaisa kirdar hai hamara

jab apne andar ki KHamiyon ko hamin ne samjha to log samjhe

samajh na paya koi bhi 'najmi' jo baat narmi se ki hai main ne

buland aawaz apni kar ke main jab bhi bola to log samjhe