raushni ki sarhad ko raund kar kahan jae

raushnī kī sarhad ko rauñd kar kahāñ jaa.e

aa ga.ī had-e-imkāñ ab nazar kahāñ jaa.e

dil-ḳharāsh aaheñ haiñ muztarib nigāheñ haiñ

har taraf karāheñ haiñ chāra-gar kahāñ jaa.e

zindagī ke sahrā meñ khā gayā hasīñ dhokā

is sarāb kā maarā lauT kar kahāñ jaa.e

har qadam pe pech-o-ḳham terā har nishāñ mub.ham

rāh-rau kahāñ jaa.e rāhbar kahāñ jaa.e

zulmatoñ kī bastī hai raushnī tarastī hai

tīrgī-parastī hai ab sahar kahāñ jaa.e

tere dar pe jiinā hai tere dar pe marnā hai

ab thakā huā 'muztar' dar-ba-dar kahāñ jaa.e

raushni ki sarhad ko raund kar kahan jae

aa gai had-e-imkan ab nazar kahan jae

dil-KHarash aahen hain muztarib nigahen hain

har taraf karahen hain chaara-gar kahan jae

zindagi ke sahra mein kha gaya hasin dhoka

is sarab ka mara lauT kar kahan jae

har qadam pe pech-o-KHam tera har nishan mubham

rah-rau kahan jae rahbar kahan jae

zulmaton ki basti hai raushni tarasti hai

tirgi-parasti hai ab sahar kahan jae

tere dar pe jina hai tere dar pe marna hai

ab thaka hua 'muztar' dar-ba-dar kahan jae