phirta hun kash koi shanasa dikhai de
phirtā huuñ kaash koī shanāsā dikhā.ī de
duniyā hai is meñ koī to apnā dikhā.ī de
us āstāñ pe jis kī jabīñ jhuk ga.ī use
kā'ba nazar paḌe na kalīsā dikhā.ī de
dīvāne is bahār ko kyā naam deñ ki jab
sahrā tamām ḳhuun kā dariyā dikhā.ī de
hoñ kam-savād kyuuñ mire kūche se āshnā
har rāh-rau ko kyuuñ tirā rastā dikhā.ī de
un marhaloñ tak aa hī gayā hai junūn-e-shauq
jin marhaloñ meñ maut tamāshā dikhā.ī de
vo kyā karegā chāñd sitāre tire baġhair
donoñ jahāñ meñ jis ko añdherā dikhā.ī de
chhīnegā us se kaun tirī yaad kā surūr
jo ḳhud ko anjuman meñ bhī tanhā dikhā.ī de
merī tarah piye jo koī ashk-e-nā-rasī
siine meñ ābshār utartā dikhā.ī de
kin dostoñ meñ jā.ūñ ki pā.ūñ vafā kī daad
merā ḳhulūs jab tumheñ dhokā dikhā.ī de
baḌhtā hai hañs ke sirf vo dār-o-rasan kī samt
dil meñ jise alaav dahaktā dikhā.ī de
us moḌ par hai qāfila-e-ehtiyāt-e-'ishq
jis meñ hañsī bhī ġham kā taqāzā dikhā.ī de
ye kyā kahā nahīñ koī shā.ista-e-jamāl
ye imtihān hai to phir achchhā dikhā.ī de
maiñ is ghaTā ko is tire sāvan ko kyā karūñ
būñdoñ meñ jab ġhubār barastā dikhā.ī de
hoñge yahāñ nujūm bhī gul bhī charāġh bhī
tum jis ke sāmne ho use kyā dikhā.ī de
maiñ aur karūñ harīf-e-nazar bhī koī qubūl
jalvoñ se bāhar aa mujhe tanhā dikhā.ī de
'dānish' ḳhudā kā shukr mujhe 'ishq ke liye
banda bhī vo milā hai jo maulā dikhā.ī de
phirta hun kash koi shanasa dikhai de
duniya hai is mein koi to apna dikhai de
us aastan pe jis ki jabin jhuk gai use
ka'ba nazar paDe na kalisa dikhai de
diwane is bahaar ko kya nam den ki jab
sahra tamam KHun ka dariya dikhai de
hon kam-sawad kyun mere kuche se aashna
har rah-rau ko kyun tera rasta dikhai de
un marhalon tak aa hi gaya hai junun-e-shauq
jin marhalon mein maut tamasha dikhai de
wo kya karega chand sitare tere baghair
donon jahan mein jis ko andhera dikhai de
chhinega us se kaun teri yaad ka surur
jo KHud ko anjuman mein bhi tanha dikhai de
meri tarah piye jo koi ashk-e-na-rasi
sine mein aabshaar utarta dikhai de
kin doston mein jaun ki paun wafa ki dad
mera KHulus jab tumhein dhoka dikhai de
baDhta hai hans ke sirf wo dar-o-rasan ki samt
dil mein jise alaw dahakta dikhai de
us moD par hai qafila-e-ehtiyat-e-'ishq
jis mein hansi bhi gham ka taqaza dikhai de
ye kya kaha nahin koi shaista-e-jamal
ye imtihan hai to phir achchha dikhai de
main is ghaTa ko is tere sawan ko kya karun
bundon mein jab ghubar barasta dikhai de
honge yahan nujum bhi gul bhi charagh bhi
tum jis ke samne ho use kya dikhai de
main aur karun harif-e-nazar bhi koi qubul
jalwon se bahar aa mujhe tanha dikhai de
'danish' KHuda ka shukr mujhe 'ishq ke liye
banda bhi wo mila hai jo maula dikhai de
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
