ye kyun kahun kisi rashk-e-qamar ne luT liya

ye kyuuñ kahūñ kisī rashk-e-qamar ne luuT liyā

mujhe to ḳhud mire zauq-e-nazar ne luuT liyā

chamak rahī thī nigāhoñ ke sāmne manzil

kahāñ pe lā ke mujhe rāhbar ne luuT liyā

'ajab maqām-e-safar hai ki ye bhī hosh nahīñ

ham aap luT ga.e yā ham-safar ne luuT liyā

kisī kā ḳhvāb-e-mohabbat thā band āñkhoñ meñ

jagā ke niiñd se mujh ko sahar ne luuT liyā

kahāñ kī diid tujhe dekhne se pahle hī

nazar kā husn tire bām-o-dar ne luuT liyā

na pūchh is dil-e-ḳhāna-ḳharāb kā 'ālam

jise nazar ne sañbhālā nazar ne luuT liyā

vo be-ḳhudī thī ki sajde kā hosh hī na rahā

jabīñ jhukī bhī na thī sang-e-dar ne luuT liyā

kaheñ to kis se kaheñ qissa-e-tabāhī-e-dil

hamāre ghar ko hamāre hī ghar ne luuT liyā

'ajīb kū-e-raqābat hai kū-e-jānāñ bhī

hamārā saaya bhī dīvār-o-dar ne luuT liyā

kashākash-e-ġham-e-hastī na miT sakī 'iqbāl'

du'ā qubūl huī to asar ne luuT liyā

ye kyun kahun kisi rashk-e-qamar ne luT liya

mujhe to KHud mere zauq-e-nazar ne luT liya

chamak rahi thi nigahon ke samne manzil

kahan pe la ke mujhe rahbar ne luT liya

'ajab maqam-e-safar hai ki ye bhi hosh nahin

hum aap luT gae ya ham-safar ne luT liya

kisi ka KHwab-e-mohabbat tha band aankhon mein

jaga ke nind se mujh ko sahar ne luT liya

kahan ki did tujhe dekhne se pahle hi

nazar ka husn tere baam-o-dar ne luT liya

na puchh is dil-e-KHana-KHarab ka 'alam

jise nazar ne sanbhaala nazar ne luT liya

wo be-KHudi thi ki sajde ka hosh hi na raha

jabin jhuki bhi na thi sang-e-dar ne luT liya

kahen to kis se kahen qissa-e-tabahi-e-dil

hamare ghar ko hamare hi ghar ne luT liya

'ajib ku-e-raqabat hai ku-e-jaanan bhi

hamara saya bhi diwar-o-dar ne luT liya

kashakash-e-gham-e-hasti na miT saki 'iqbaal'

du'a qubul hui to asar ne luT liya