tere safar mein mohabbat safed baal hue

tire safar meñ mohabbat safed baal hue

is ik 'amal meñ mujhe jaane kitne saal hue

jo mujh daraḳht se TuuTī thī ruuTh kar Daalī

bichhaḌ ke dekhiye kyā aaj us ke haal hue

vo khoTā sikka samajhtī rahī hameñ lekin

hamīñ nazar meñ zamāne kī be-misāl hue

bas ek maiñ hī tarastā huuñ nik.hat-e-gul ko

mire raqīb to ḳhushbū se mālā-māl hue

baḌe sukūn se rahtā hai apnī duniyā meñ

vo shaḳhs jis ke liye saikḌoñ bavāl hue

kisī ne uñglī uThā.ī nahīñ hai us kī taraf

hamesha sirf mirī zaat par savāl hue

ham us kī aas lagā.e hue haiñ ab bhī 'kabīr'

bahut zamāna huā jis kā intiqāl hue

tere safar mein mohabbat safed baal hue

is ek 'amal mein mujhe jaane kitne sal hue

jo mujh daraKHt se TuTi thi ruTh kar Dali

bichhaD ke dekhiye kya aaj us ke haal hue

wo khoTa sikka samajhti rahi hamein lekin

hamin nazar mein zamane ki be-misal hue

bas ek main hi tarasta hun nikhat-e-gul ko

mere raqib to KHushbu se mala-mal hue

baDe sukun se rahta hai apni duniya mein

wo shaKHs jis ke liye saikDon bawal hue

kisi ne ungli uThai nahin hai us ki taraf

hamesha sirf meri zat par sawal hue

hum us ki aas lagae hue hain ab bhi 'kabir'

bahut zamana hua jis ka intiqal hue