safar ki dhup mein jab sae yaad aane lage

safar kī dhuup meñ jab saa.e yaad aane lage

qalam nikāl ke kāġhaz pe ghar banāne lage

kisī bhī shaḳhs ke itnā qarīb mat aao

ki us ke chhoḌ ke jaane kā Dar satāne lage

ham aise log muhāfiz haiñ raushnī ke janāb

jahāñ bhī tīrgī dekhī diye jalāne lage

ye aur baat havāoñ meñ tiir chhoḌe the

mujhe to itnā pata hai mire nishāne lage

hazār ranj sahe laakh rā.egānī huī

ḳhudā kā shukr kiyā aur muskurāne lage

vo shaḳhs itnā hasīñ hai ki us kī diid ke baa'd

udaas log masarrat ke giit gaane lage

guzashta roz mirī rahnumā.ī meñ the jo log

hañso vo aaj mujhe rāsta batāne lage

hamārā chīḳhte rahnā to yuuñ fuzūl gayā

ki jaise jugnū koī din meñ jagmagāne lage

phir ek roz mirī saañs ruk ga.ī 'kāshif'

sabhī masā.il-e-duniyā mire Thikāne lage

safar ki dhup mein jab sae yaad aane lage

qalam nikal ke kaghaz pe ghar banane lage

kisi bhi shaKHs ke itna qarib mat aao

ki us ke chhoD ke jaane ka Dar satane lage

hum aise log muhafiz hain raushni ke janab

jahan bhi tirgi dekhi diye jalane lage

ye aur baat hawaon mein tir chhoDe the

mujhe to itna pata hai mere nishane lage

hazar ranj sahe lakh raegani hui

KHuda ka shukr kiya aur muskurane lage

wo shaKHs itna hasin hai ki us ki did ke ba'd

udas log masarrat ke git gane lage

guzashta roz meri rahnumai mein the jo log

hanso wo aaj mujhe rasta batane lage

hamara chiKHte rahna to yun fuzul gaya

ki jaise jugnu koi din mein jagmagane lage

phir ek roz meri sans ruk gai 'kashif'

sabhi masail-e-duniya mere Thikane lage