rah ko jo aasan bana de wo manzil kya manzil hai

raah ko jo āsān banā de vo manzil kyā manzil hai

har manzil se aage yaaro apne shauq kā hāsil hai

jis ko dard kā darmāñ samjhā vo bhī dard bharā dil hai

itne dard pe bhī ye duniyā kitne pyaar ke qābil hai

bāhar se āvāz ye aa.e tum hī masīhā ho apne

mere andar shor bapā ho dil hī apnā qātil hai

kuchh manzil par jā sustā.e kuchh rāhoñ meñ baiTh ga.e

koī kisī kā bhed na jaane apnī apnī manzil hai

ham ko insāñ aur ḳhudā ke farq pe kitnī vahshat thī

dekhā to is dorāhe par apnī zaat hī haa.el hai

nā-dānoñ ko de detī hai duniyā farzānoñ kā naam

vo hī dīvāna kahlā.e jo bhī 'ishq meñ kāmil hai

rang-e-mohabbat rang-e-abad hai phuul huuñ maiñ mahkār hai tū

daa.im qaa.em raunaq-e-hastī terī merī mahfil hai

tūfānoñ se Dar jaa.eñ to sāhil se tūfān umDeñ

maujoñ ko patvār banā leñ to har mauj hī sāhil hai

mushkil ko āsān samajh ke ham har 'uqda kholeñge

apnī fikr 'jamīl' kareñ vo sahl bhī jin ko mushkil hai

rah ko jo aasan bana de wo manzil kya manzil hai

har manzil se aage yaro apne shauq ka hasil hai

jis ko dard ka darman samjha wo bhi dard bhara dil hai

itne dard pe bhi ye duniya kitne pyar ke qabil hai

bahar se aawaz ye aae tum hi masiha ho apne

mere andar shor bapa ho dil hi apna qatil hai

kuchh manzil par ja sustae kuchh rahon mein baiTh gae

koi kisi ka bhed na jaane apni apni manzil hai

hum ko insan aur KHuda ke farq pe kitni wahshat thi

dekha to is dorahe par apni zat hi hael hai

na-danon ko de deti hai duniya farzanon ka nam

wo hi diwana kahlae jo bhi 'ishq mein kaamil hai

rang-e-mohabbat rang-e-abad hai phul hun main mahkar hai tu

daim qaem raunaq-e-hasti teri meri mahfil hai

tufanon se Dar jaen to sahil se tufan umDen

maujon ko patwar bana len to har mauj hi sahil hai

mushkil ko aasan samajh ke hum har 'uqda kholenge

apni fikr 'jamil' karen wo sahl bhi jin ko mushkil hai