main kam-nigah nahin hun meri nazar mein hai

maiñ kam-nigāh nahīñ huuñ mirī nazar meñ hai

vo zindagī kī fazīlat jo ik bashar meñ hai

kisī kī yaad satātī hai jab guzartā huuñ

maiñ us galī kī taraf se jo rah-guzar meñ hai

shu'ūr-e-rāhravī ko du'ā.eñ detā huuñ

ki mere saath mirā rahnumā safar meñ hai

fareb dene kī zahmat na kījiye vā'iz

rah-e-hayāt kī manzil mirī nazar meñ hai

hamāre vāste rahbar se baḌh ke hai 'rāhī'

vo ek miil kā patthar jo rah-guzar meñ hai

main kam-nigah nahin hun meri nazar mein hai

wo zindagi ki fazilat jo ek bashar mein hai

kisi ki yaad satati hai jab guzarta hun

main us gali ki taraf se jo rah-guzar mein hai

shu'ur-e-rahrawi ko du'aen deta hun

ki mere sath mera rahnuma safar mein hai

fareb dene ki zahmat na kijiye wa'iz

rah-e-hayat ki manzil meri nazar mein hai

hamare waste rahbar se baDh ke hai 'rahi'

wo ek mil ka patthar jo rah-guzar mein hai