karishma-sazi-e-nazzara mehr-o-mah mein hai

karishma-sāzī-e-nazzāra mehr-o-māh meñ hai

tamām 'ālam-e-imkāñ mirī nigāh meñ hai

safar ke baa'd paḌāo bhī ek raah meñ hai

ma.āl-e-kār bhī merā mirī nigāh meñ hai

subū se jaam se lipTī hai vaz'-dārī-e-shauq

ḳhizāñ-rasīda javānī mazā nibāh meñ hai

har ek jaam pe niklā hai muñh se bismillah

ḳhudā kā zikr bhī shāmil mire gunāh meñ hai

nazar se dāman-e-dil meñ sameT luuñ kyūñ-kar

jo nuur bikhrā huā terī jalva-gāh meñ hai

salīb-o-dār bhī haiñ aur gale bhī kaTte haiñ

baḌī hī jaan kī jokhim tumhārī chaah meñ hai

na tamkanat hai na naḳhvat na bāñkpan hai 'munīr'

sar-e-buland kahāñ aaj kaj-kulāh meñ hai

karishma-sazi-e-nazzara mehr-o-mah mein hai

tamam 'alam-e-imkan meri nigah mein hai

safar ke ba'd paDao bhi ek rah mein hai

maal-e-kar bhi mera meri nigah mein hai

subu se jam se lipTi hai waz'-dari-e-shauq

KHizan-rasida jawani maza nibah mein hai

har ek jam pe nikla hai munh se bismillah

KHuda ka zikr bhi shamil mere gunah mein hai

nazar se daman-e-dil mein sameT lun kyun-kar

jo nur bikhra hua teri jalwa-gah mein hai

salib-o-dar bhi hain aur gale bhi kaTte hain

baDi hi jaan ki jokhim tumhaari chah mein hai

na tamkanat hai na naKHwat na bankpan hai 'munir'

sar-e-buland kahan aaj kaj-kulah mein hai