jo hauslon se samundar khangal Dalega

jo hausloñ se samundar khañgāl Dālegā

yaqīñ hai gauhar-e-maqsad zarūr pā legā

añdherā baḳhshā hai jis ne hamārī hastī ko

hamāre ḳhāna-e-dil ko vahī ujālegā

ġhurūr-o-faḳhr se jo sar uThā ke chaltā hai

kabhī vo fart-e-nadāmat se muñh chhupā legā

vo jis se rishta sar-e-rāh tum ne toḌ liyā

kisī ko vo bhī sharīk-e-safar banā legā

safar meñ 'azm javāñ hai to bil-yaqīñ ik din

bhaTakne vaalā bhī manzil zarūr pā legā

vo jis ko yaad hai mehr-o-vafā ḳhulūs kā fan

vo shaḳhs dil meñ sabhī ke jagah banā legā

jo mas.aloñ meñ ghirā huuñ to us kā ġham kyoñ ho

ḳhudā ḳhudā hai koī rāsta nikālegā

vo maal kā hī nahīñ dil kā hai ġhanī 'kāvish'

kisī faqīr ko dar se na apne Tālegā

jo hauslon se samundar khangal Dalega

yaqin hai gauhar-e-maqsad zarur pa lega

andhera baKHsha hai jis ne hamari hasti ko

hamare KHana-e-dil ko wahi ujalega

ghurur-o-faKHr se jo sar uTha ke chalta hai

kabhi wo fart-e-nadamat se munh chhupa lega

wo jis se rishta sar-e-rah tum ne toD liya

kisi ko wo bhi sharik-e-safar bana lega

safar mein 'azm jawan hai to bil-yaqin ek din

bhaTakne wala bhi manzil zarur pa lega

wo jis ko yaad hai mehr-o-wafa KHulus ka fan

wo shaKHs dil mein sabhi ke jagah bana lega

jo masalon mein ghira hun to us ka gham kyon ho

KHuda KHuda hai koi rasta nikalega

wo mal ka hi nahin dil ka hai ghani 'kawish'

kisi faqir ko dar se na apne Talega