ek be-jahat safar ne thakaya bahut mujhe

ik be-jahat safar ne thakāyā bahut mujhe

maiñ ābla-qadam thī bhagāyā bahut mujhe

āsūdgī meñ ġham kā bhī kuchh kuchh milāp thā

jīvan kā jo bhī rang thā bhāyā bahut mujhe

yuuñ to chamak rahī thī mire ḳhvāb kī kiran

us māh-e-nīm-shab ne rulāyā bahut mujhe

maiñ jis ke dā.ere meñ chakoroñ sī yuuñ phirūñ

vo māh-tāb samjhe parāyā bahut mujhe

mujh ko ḳhalā meñ jā ke bhaTakne se Dar lagā

har chand āsmāñ ne bulāyā bahut mujhe

dariyā se Dūbte ne kināre kī baat kī

maujoñ ne raaz kholā satāyā bahut mujhe

ye maiñ jo raushnī kā sarāpā huuñ mere dost

ik hijr ne azal se jalāyā bahut mujhe

ghāTe kā kār-o-bār huuñ ye jāntā thā vo

hairat hai us ne phir bhī kamāyā bahut mujhe

ek be-jahat safar ne thakaya bahut mujhe

main aabla-qadam thi bhagaya bahut mujhe

aasudgi mein gham ka bhi kuchh kuchh milap tha

jiwan ka jo bhi rang tha bhaya bahut mujhe

yun to chamak rahi thi mere KHwab ki kiran

us mah-e-nim-shab ne rulaya bahut mujhe

main jis ke daere mein chakoron si yun phirun

wo mah-tab samjhe paraya bahut mujhe

mujh ko KHala mein ja ke bhaTakne se Dar laga

har chand aasman ne bulaya bahut mujhe

dariya se Dubte ne kinare ki baat ki

maujon ne raaz khola sataya bahut mujhe

ye main jo raushni ka sarapa hun mere dost

ek hijr ne azal se jalaya bahut mujhe

ghaTe ka kar-o-bar hun ye jaanta tha wo

hairat hai us ne phir bhi kamaya bahut mujhe