hai zabt ki tauhin ka Dar sham se pahle

hai zabt kī tauhīn kā Dar shaam se pahle

kartā hī nahīñ aañkh ko tar shaam se pahle

mumkin hai sar-e-shab hī hameñ hukm-e-safar ho

kar lo kisī dīvār meñ dar shaam se pahle

phir tīrgī sar chaḌh ke nahīñ bolne vaalī

kuchh diip jalā loge agar shaam se pahle

khultī haiñ pas-e-shām hī chehroñ se naqābeñ

sab nek hī dikhte haiñ magar shaam se pahle

chamkā hai siyah-rāt meñ tanhā.ī kā sūraj

har shaḳhs mire saath thā par shaam se pahle

ham sham'-sifat log haiñ so is liye ham par

paḌtī hī nahīñ koī nazar shaam se pahle

tā-'umr satā.egī unheñ dasht kī vahshat

ghabrā ke palaT aa.e jo ghar shaam se pahle

parvāz-pasandoñ ke gharāne se huuñ 'kāshif'

kyā kaam mirā zer-e-shajar shaam se pahle

hai zabt ki tauhin ka Dar sham se pahle

karta hi nahin aankh ko tar sham se pahle

mumkin hai sar-e-shab hi hamein hukm-e-safar ho

kar lo kisi diwar mein dar sham se pahle

phir tirgi sar chaDh ke nahin bolne wali

kuchh dip jala loge agar sham se pahle

khulti hain pas-e-sham hi chehron se naqaben

sab nek hi dikhte hain magar sham se pahle

chamka hai siyah-raat mein tanhai ka suraj

har shaKHs mere sath tha par sham se pahle

hum sham'-sifat log hain so is liye hum par

paDti hi nahin koi nazar sham se pahle

ta-'umr sataegi unhen dasht ki wahshat

ghabra ke palaT aae jo ghar sham se pahle

parwaz-pasandon ke gharane se hun 'kashif'

kya kaam mera zer-e-shajar sham se pahle