chal sake dil ke na ham-rah nazar ke sathi

chal sake dil ke na ham-rāh nazar ke sāthī

rah-guzar meñ hī rahe rāh-guzar ke sāthī

har kiran dil meñ basā lete haiñ ham to lekin

shaam tak saath bhī hoñge ye sahar ke sāthī

har kināre kī taraf sūrat-e-dariyā dekho

rāsta rok bhī lete haiñ safar ke sāthī

qāfile shor machāte hue guzre lekin

apnī dīvār se aa.e na utar ke sāthī

ḳhushk shāḳhoñ pe sar-e-shām jo aa baiThte haiñ

vahī do chaar parinde haiñ shajar ke sāthī

chāk-e-dāman kā gila karte rahe ham 'bāqī'

aur mahfil se uThe jholiyāñ bhar ke sāthī

chal sake dil ke na ham-rah nazar ke sathi

rah-guzar mein hi rahe rah-guzar ke sathi

har kiran dil mein basa lete hain hum to lekin

sham tak sath bhi honge ye sahar ke sathi

har kinare ki taraf surat-e-dariya dekho

rasta rok bhi lete hain safar ke sathi

qafile shor machate hue guzre lekin

apni diwar se aae na utar ke sathi

KHushk shaKHon pe sar-e-sham jo aa baiThte hain

wahi do chaar parinde hain shajar ke sathi

chaak-e-daman ka gila karte rahe hum 'baqi'

aur mahfil se uThe jholiyan bhar ke sathi