aa dost aisi gaDi mein ja kar sawar ho

aa dost aisī gaaḌī meñ jā kar savār ho

jo chalte chalte duniyā kī sarhad se paar ho

koshish to kar rahā huuñ ki ab hausla rakhūñ

āñkhoñ kā kyā bharosa ki kab ashk-bār ho

ik zaḳhm bhī bharā na thā kuchh zaḳhm phir mile

yā'nī sitam se chuur badan tār-tār ho

sab dushmanoñ se bach ke nikal jaa.e aur phir

tarkash meñ tiir le ke numūdār yaar ho

pahle chhiḌak rahā thā vahī zaḳhm par namak

ab kyā karūñ vo shaḳhs agar ġham-gusār ho

chalne kī Thaan lī hai to muḌ kar na dekhnā

raste meñ chāhe phuul ho patthar ho ḳhaar ho

she'r-o-suḳhan se ghar nahīñ chaltā mire 'azīz

koshish maiñ kar rahā huuñ ki kuchh rozgār ho

aa dost aisi gaDi mein ja kar sawar ho

jo chalte chalte duniya ki sarhad se par ho

koshish to kar raha hun ki ab hausla rakhun

aankhon ka kya bharosa ki kab ashk-bar ho

ek zaKHm bhi bhara na tha kuchh zaKHm phir mile

ya'ni sitam se chur badan tar-tar ho

sab dushmanon se bach ke nikal jae aur phir

tarkash mein tir le ke numudar yar ho

pahle chhiDak raha tha wahi zaKHm par namak

ab kya karun wo shaKHs agar gham-gusar ho

chalne ki Than li hai to muD kar na dekhna

raste mein chahe phul ho patthar ho KHar ho

she'r-o-suKHan se ghar nahin chalta mere 'aziz

koshish main kar raha hun ki kuchh rozgar ho