tujhse mil kar to ye lagta hai ki ai ajnabi dost

tujh se mil kar to ye lagtā hai ki ai ajnabī dost

tū mirī pahlī mohabbat thī mirī āḳhirī dost

log har baat kā afsāna banā dete haiñ

ye to duniyā hai mirī jaañ ka.ī dushman ka.ī dost

tere qāmat se bhī lipTī hai amar-bel koī

merī chāhat ko bhī duniyā kī nazar khā ga.ī dost

yaad aa.ī hai to phir TuuT ke yaad aa.ī hai

koī guzrī huī manzil koī bhūlī huī dost

ab bhī aa.e ho to ehsān tumhārā lekin

vo qayāmat jo guzarnī thī guzar bhī ga.ī dost

tere lahje kī thakan meñ tirā dil shāmil hai

aisā lagtā hai judā.ī kī ghaḌī aa ga.ī dost

bārish-e-sañg kā mausam hai mire shahr meñ to

tū ye shīshe sā badan le ke kahāñ aa ga.ī dost

maiñ use ahd-shikan kaise samajh luuñ jis ne

āḳhirī ḳhat meñ ye likkhā thā faqat aap kī dost

tujh se mil kar to ye lagta hai ki ai ajnabi dost

tu meri pahli mohabbat thi meri aaKHiri dost

log har baat ka afsana bana dete hain

ye to duniya hai meri jaan kai dushman kai dost

tere qamat se bhi lipTi hai amar-bel koi

meri chahat ko bhi duniya ki nazar kha gai dost

yaad aai hai to phir TuT ke yaad aai hai

koi guzri hui manzil koi bhuli hui dost

ab bhi aae ho to ehsan tumhaara lekin

wo qayamat jo guzarni thi guzar bhi gai dost

tere lahje ki thakan mein tera dil shamil hai

aisa lagta hai judai ki ghaDi aa gai dost

barish-e-sang ka mausam hai mere shahr mein to

tu ye shishe sa badan le ke kahan aa gai dost

main use ahd-shikan kaise samajh lun jis ne

aaKHiri KHat mein ye likkha tha faqat aap ki dost