rasm-e-duniya bhi hai kya KHub nibhai maine

rasm-e-duniyā bhī hai kyā ḳhuub nibhā.ī maiñ ne

ham-nashīñ tere liye bazm sajā.ī maiñ ne

diip se diip shab-o-roz jalā.e rakhnā

ye rivāyat bhī hai kyā ḳhuub nibhā.ī maiñ ne

aa zarā dekh yahāñ kitnā sukūñ miltā hai

jab ki vīrāne meñ duniyā hai basā.ī maiñ ne

ek muddat se utar paayā na bātoñ kā ḳhumār

shaam jo aap kī qurbat meñ bitā.ī maiñ ne

god se gor talak jo bhī ḳhushī paa.ī thī

āḳhirash pyaar meñ ai dost luTā.ī maiñ ne

'umr bhar is meñ hameñ ashk mile aa.heñ milīñ

jaane kis kis ko kahānī ye sunā.ī maiñ ne

vo ba-zid hai ki use phaaḌ duuñ ab hāthoñ se

nau baras meñ hai jo tasvīr banā.ī maiñ ne

bebasī dekh mirī apnī hī mayyit ro kar

apne hāthoñ se mire dost uThā.ī maiñ ne

mujh se nārāz hai vo kis ko batā.ūñ 'qaisar'

jis kī ḳhātir hai sabhī duniyā bhulā.ī maiñ ne

rasm-e-duniya bhi hai kya KHub nibhai main ne

ham-nashin tere liye bazm sajai main ne

dip se dip shab-o-roz jalae rakhna

ye riwayat bhi hai kya KHub nibhai main ne

aa zara dekh yahan kitna sukun milta hai

jab ki virane mein duniya hai basai main ne

ek muddat se utar paya na baaton ka KHumar

sham jo aap ki qurbat mein bitai main ne

god se gor talak jo bhi KHushi pai thi

aaKHirash pyar mein ai dost luTai main ne

'umr bhar is mein hamein ashk mile aahen milin

jaane kis kis ko kahani ye sunai main ne

wo ba-zid hai ki use phaD dun ab hathon se

nau baras mein hai jo taswir banai main ne

bebasi dekh meri apni hi mayyit ro kar

apne hathon se mere dost uThai main ne

mujh se naraaz hai wo kis ko bataun 'qaisar'

jis ki KHatir hai sabhi duniya bhulai main ne