mere wahm-o-guman mein tha hi nahin

mere vahm-o-gumāñ meñ thā hī nahīñ

koī kaun-o-makāñ meñ thā hī nahīñ

ek tū thā tirī mohabbat thī

aur kuchh darmiyāñ meñ thā hī nahīñ

jaisā batlāte haiñ zamīñ vaale

aisā kuchh āsmāñ meñ thā hī nahīñ

ruuh ke ruuh se marāsim the

jism to darmiyāñ meñ thā hī nahīñ

mat pareshān ho mirī ḳhātir

maiñ kisī dāstāñ meñ thā hī nahīñ

sach ugalne se roktā jo mujhe

aisā chhālā zabāñ meñ thā hī nahīñ

us kī tash.hīr ho rahī hai bahut

vo jo mere bayāñ meñ thā hī nahīñ

varna yuuñ chhoḌtā kahāñ mujh ko

tiir us kī kamāñ meñ thā hī nahīñ

merī maujūdgī batā.ī ga.ī

maiñ tire kārvāñ meñ thā hī nahīñ

shukr hai saath tum rahe varna

lutf kār-e-jahāñ meñ thā hī nahīñ

mere wahm-o-guman mein tha hi nahin

koi kaun-o-makan mein tha hi nahin

ek tu tha teri mohabbat thi

aur kuchh darmiyan mein tha hi nahin

jaisa batlate hain zamin wale

aisa kuchh aasman mein tha hi nahin

ruh ke ruh se marasim the

jism to darmiyan mein tha hi nahin

mat pareshan ho meri KHatir

main kisi dastan mein tha hi nahin

sach ugalne se rokta jo mujhe

aisa chhaala zaban mein tha hi nahin

us ki tashhir ho rahi hai bahut

wo jo mere bayan mein tha hi nahin

warna yun chhoDta kahan mujh ko

tir us ki kaman mein tha hi nahin

meri maujudgi batai gai

main tere karwan mein tha hi nahin

shukr hai sath tum rahe warna

lutf kar-e-jahan mein tha hi nahin