sare mamulat mein ek taza gardish chahiye

saare ma.amūlāt meñ ik taaza gardish chāhiye

nam zamīñ par ḳhushk mausam kī navāzish chāhiye

shahr ke aa.iin meñ ye mad bhī likkhī jā.egī

zinda rahnā ho to qātil kī sifārish chāhiye

merī mushkil bhāgte lamhoñ ko pakḌūñ kis tarah

zid use an-dekhe ḳhvāboñ kī numā.ish chāhiye

bhejtā maiñ kis ko sub.hoñ kī kuñvārī raushnī

us ko būḌhī raat ke rañgoñ kī tābish chāhiye

sūkhte alfāz ke mausam meñ harf-e-tar huuñ maiñ

phir sazā pahle samā.at kī navāzish chāhiye

jo hamārā thā vo niklā āftāboñ kā halīf

kis ḳhudā se ab kahā jaa.e ki bārish chāhiye

bāryābī shart-e-ḳhāmoshī pe hai vo is tarah

pahle hī tafsīl-e-ahvāl-e-guzārish chāhiye

buz-dilī merī thī jo 'manzūr' maiñ zaḳhmī huā

vo sipar-bardār the un kī satā.ish chāhiye

sare mamulat mein ek taza gardish chahiye

nam zamin par KHushk mausam ki nawazish chahiye

shahr ke aain mein ye mad bhi likkhi jaegi

zinda rahna ho to qatil ki sifarish chahiye

meri mushkil bhagte lamhon ko pakDun kis tarah

zid use an-dekhe KHwabon ki numaish chahiye

bhejta main kis ko subhon ki kunwari raushni

us ko buDhi raat ke rangon ki tabish chahiye

sukhte alfaz ke mausam mein harf-e-tar hun main

phir saza pahle samaat ki nawazish chahiye

jo hamara tha wo nikla aaftabon ka halif

kis KHuda se ab kaha jae ki barish chahiye

baryabi shart-e-KHamoshi pe hai wo is tarah

pahle hi tafsil-e-ahwal-e-guzarish chahiye

buz-dili meri thi jo 'manzur' main zaKHmi hua

wo sipar-bardar the un ki sataish chahiye