sanson ke taaqub mein hairan mili duniya

sāñsoñ ke ta.āqub meñ hairān milī duniyā

tasvīr bane jab ham ā.īna huī duniyā

ham ḳhuun pasīna jab ik kar ke hue raushan

kyuuñ aag banī duniyā aur ḳhuub jalī duniyā

apnā nazariyya kyā mahrūm-e-nazar haiñ jab

us samt chale ham bhī jis samt chalī duniyā

sailāb-e-balā se ye kyuuñ ḳhauf dilātī hai

kyā ham ko bachā.egī sho.aloñ meñ ghirī duniyā

ma.amūl judā.ī hai go phuul kī gulshan se

lekin jo huī anqā ḳhvāboñ meñ basī duniyā

sab ḳhvāb purāne haiñ har chand fasāne haiñ

ham roz basāte haiñ āñkhoñ meñ na.ī duniyā

ham donoñ safar meñ the ma.alūm nahīñ ab kuchh

kyā tū ne kahī duniyā kyā ham ne sunī duniyā

fardā-e-qayāmat kā va.ada tirā pursāñ hai

ab kitnī bachīñ sāñseñ ab kitnī bachī duniyā

har baat pe hairānī har lamhe kī nigrānī

duniyā se 'atā' ya.anī kab samjhī ga.ī duniyā

sanson ke taaqub mein hairan mili duniya

taswir bane jab hum aaina hui duniya

hum KHun pasina jab ek kar ke hue raushan

kyun aag bani duniya aur KHub jali duniya

apna nazariyya kya mahrum-e-nazar hain jab

us samt chale hum bhi jis samt chali duniya

sailab-e-bala se ye kyun KHauf dilati hai

kya hum ko bachaegi shoalon mein ghiri duniya

mamul judai hai go phul ki gulshan se

lekin jo hui anqa KHwabon mein basi duniya

sab KHwab purane hain har chand fasane hain

hum roz basate hain aankhon mein nai duniya

hum donon safar mein the malum nahin ab kuchh

kya tu ne kahi duniya kya hum ne suni duniya

farda-e-qayamat ka wada tera pursan hai

ab kitni bachin sansen ab kitni bachi duniya

har baat pe hairani har lamhe ki nigrani

duniya se 'ata' yani kab samjhi gai duniya