ruh aur badan donon dagh dagh hain yaro

ruuh aur badan donoñ daaġh daaġh haiñ yaaro

phir bhī apne bām-o-dar be-charāġh haiñ yaaro

aao ham meñ Dhal jaao umr bhar ke pyāse haiñ

tum sharāb ho yaaro ham ayāġh haiñ yaaro

jin pe bārish-e-gul hai un kā haal kyā hogā

zaḳhm khāne vaale bhī baaġh baaġh haiñ yaaro

jin ko rah ke kāñToñ meñ ḳhush-mizāj honā thā

vo maqām-e-gul pā kar be-dimāġh haiñ yaaro

ham se mil ke fitrat ke pech-o-ḳham ko samjhoge

ham jahān-e-fitrat kā ik surāġh haiñ yaaro

nā-shanāsoñ kī tahsīñ rañg laa.ī hai kyā kyā

koile bhī ab lāl-e-shab-charāġh haiñ yaaro

ham hasīn ġhazloñ se peT bhar nahīñ sakte

daulat-e-suḳhan le kar be-farāġh haiñ yaaro

ruh aur badan donon dagh dagh hain yaro

phir bhi apne baam-o-dar be-charagh hain yaro

aao hum mein Dhal jao umr bhar ke pyase hain

tum sharab ho yaro hum ayagh hain yaro

jin pe barish-e-gul hai un ka haal kya hoga

zaKHm khane wale bhi bagh bagh hain yaro

jin ko rah ke kanTon mein KHush-mizaj hona tha

wo maqam-e-gul pa kar be-dimagh hain yaro

hum se mil ke fitrat ke pech-o-KHam ko samjhoge

hum jahan-e-fitrat ka ek suragh hain yaro

na-shanason ki tahsin rang lai hai kya kya

koile bhi ab lal-e-shab-charagh hain yaro

hum hasin ghazlon se peT bhar nahin sakte

daulat-e-suKHan le kar be-faragh hain yaro