rumuz-e-maslahat ko zehn par tari nahin karta

rumūz-e-maslahat ko zehn par taarī nahīñ kartā

zamīr-e-ādmiyyat se maiñ ġhaddārī nahīñ kartā

qalam shāḳh-e-sadāqat hai zabāñ barg-e-amānat hai

jo dil meñ hai vo kahtā huuñ adākārī nahīñ kartā

maiñ āḳhir aadmī huuñ koī laġhzish ho hī jaatī hai

magar ik vasf hai mujh meñ dil-āzārī nahīñ kartā

maiñ dāmān-e-nazar meñ kis liye saarā chaman bhar luuñ

mirā zauq-e-tamāshā bār-bardārī nahīñ kartā

mukāfāt-e-amal ḳhud rāsta tajvīz kartī hai

ḳhudā qaumoñ pe apnā faisla jaarī nahīñ kartā

mire bachche tujhe itnā tavakkul raas aa jaa.e

ki sar par imtihāñ hai aur tayyārī nahīñ kartā

maiñ 'āsī' husn kī ā.īna-dārī ḳhuub kartā huuñ

magar maiñ husn kī ā.īna-bardārī nahīñ kartā

rumuz-e-maslahat ko zehn par tari nahin karta

zamir-e-admiyyat se main ghaddari nahin karta

qalam shaKH-e-sadaqat hai zaban barg-e-amanat hai

jo dil mein hai wo kahta hun adakari nahin karta

main aaKHir aadmi hun koi laghzish ho hi jati hai

magar ek wasf hai mujh mein dil-azari nahin karta

main daman-e-nazar mein kis liye sara chaman bhar lun

mera zauq-e-tamasha bar-bardari nahin karta

mukafat-e-amal KHud rasta tajwiz karti hai

KHuda qaumon pe apna faisla jari nahin karta

mere bachche tujhe itna tawakkul ras aa jae

ki sar par imtihan hai aur tayyari nahin karta

main 'asi' husn ki aaina-dari KHub karta hun

magar main husn ki aaina-bardari nahin karta