wo apni baat par hi aDa rah nahin saka

vo apnī baat par hī aḌā rah nahīñ sakā

so maiñ bhī us ke saath khaḌā rah nahīñ sakā

ik ek iiñT merī uThā le gaye haiñ log

dar kyā girā ki maiñ bhī khaḌā rah nahīñ sakā

is baar pahlā tiir na aayā mirī taraf

yā'nī maiñ saf meñ sab se baḌā rah nahīñ sakā

āḳhir havā se chhīn ke miTTī ne khā liyā

patta shajar se jo bhī jhaḌā rah nahīñ sakā

tū mujh ko sang-e-mīl samajh kar guzar na jaa.e

ye soch kar zamīñ meñ gaḌā rah nahīñ sakā

maiñ to chhupā huā thā zamāne kī aañkh se

chup-chāp tū hī mujh meñ paḌā rah nahīñ sakā

ik baar us kā chehra dikhāyā use 'zahīr'

phir us ke pairahan meñ jaḌā rah nahīñ sakā

wo apni baat par hi aDa rah nahin saka

so main bhi us ke sath khaDa rah nahin saka

ek ek inT meri uTha le gaye hain log

dar kya gira ki main bhi khaDa rah nahin saka

is bar pahla tir na aaya meri taraf

ya'ni main saf mein sab se baDa rah nahin saka

aaKHir hawa se chhin ke miTTi ne kha liya

patta shajar se jo bhi jhaDa rah nahin saka

tu mujh ko sang-e-mil samajh kar guzar na jae

ye soch kar zamin mein gaDa rah nahin saka

main to chhupa hua tha zamane ki aankh se

chup-chap tu hi mujh mein paDa rah nahin saka

ek bar us ka chehra dikhaya use 'zahir'

phir us ke pairahan mein jaDa rah nahin saka