kyon bana barq-e-shola-sharar aadmi

kyoñ banā barq-e-sho'la-sharar aadmī

ġhaur is par kare aaj har aadmī

kal kā sūraj payām-e-ḳhushī lā.egā

jī rahā hai is ummīd par aadmī

jiite jī uljhanoñ se rihā.ī kahāñ

chāhtā to hai un se mafar aadmī

ye maraz yūñhī lāhiq to hotā nahīñ

mol letā hai ḳhud dard-e-sar aadmī

aarzū māl-o-zar kī 'abas hai miyāñ

jab hai misl-e-charāġh-e-sahar aadmī

mulk bīmār hai qaum bīmār hai

keh do DhūñDe koī chārāgar aadmī

dā'vā-e-amn-o-rāhat hai tum ko to phir

kyuuñ pareshān hai aaj har aadmī

be-hunar log haiñ manzar-e-'ām par

aur gosha-nashīñ bā-hunar aadmī

pahle rakhtā thā siine meñ ḳhauf-e-ḳhudā

aaj rakhtā hai duniyā kā Dar aadmī

gird mere sabhī bā-hunar log haiñ

maiñ hī 'kāvish' huuñ ik be-hunar aadmī

kyon bana barq-e-sho'la-sharar aadmi

ghaur is par kare aaj har aadmi

kal ka suraj payam-e-KHushi laega

ji raha hai is ummid par aadmi

jite ji uljhanon se rihai kahan

chahta to hai un se mafar aadmi

ye maraz yunhi lahiq to hota nahin

mol leta hai KHud dard-e-sar aadmi

aarzu mal-o-zar ki 'abas hai miyan

jab hai misl-e-charagh-e-sahar aadmi

mulk bimar hai qaum bimar hai

keh do DhunDe koi chaaragar aadmi

da'wa-e-amn-o-rahat hai tum ko to phir

kyun pareshan hai aaj har aadmi

be-hunar log hain manzar-e-'am par

aur gosha-nashin ba-hunar aadmi

pahle rakhta tha sine mein KHauf-e-KHuda

aaj rakhta hai duniya ka Dar aadmi

gird mere sabhi ba-hunar log hain

main hi 'kawish' hun ek be-hunar aadmi