apne dar se na kabhi mujhko uThana jaanan

apne dar se na kabhī mujh ko uThānā jānāñ

tū agar hai to mayassar hai zamāna jānāñ

maiñ agar she'r huuñ tum dūsrā misra' jānāñ

tum jo mil jaao to ho jā.ūñgā puurā jānāñ

ham se mat miliye raqīboñ se to duurī rakhiye

TuuT jaa.e na kahīñ dil kā bharosa jānāñ

jhūTā vā'da hī karo ham to yaqīñ karte haiñ

phir banā lenā nayā koī bahāna jānāñ

ye guzārish hai ki bāzāroñ kī zīnat na bano

tum to achchhe ho burā hai ye zamāna jānāñ

tere aane ki ḳhabar sun ke bahār aa.ī hai

phuul khil uTThe haiñ mausam hai suhānā jānāñ

dil abhī Thiik se TuuTā bhī nahīñ hai merā

Thiik se toḌ ke jaanā ho to jaanā jānāñ

daaġh chehre ke to dhul jaate haiñ lekin ai 'bilāl'

daaġh dāman pe na lag jaa.e bachānā jānāñ

apne dar se na kabhi mujh ko uThana jaanan

tu agar hai to mayassar hai zamana jaanan

main agar she'r hun tum dusra misra' jaanan

tum jo mil jao to ho jaunga pura jaanan

hum se mat miliye raqibon se to duri rakhiye

TuT jae na kahin dil ka bharosa jaanan

jhuTa wa'da hi karo hum to yaqin karte hain

phir bana lena naya koi bahana jaanan

ye guzarish hai ki bazaron ki zinat na bano

tum to achchhe ho bura hai ye zamana jaanan

tere aane ki KHabar sun ke bahaar aai hai

phul khil uTThe hain mausam hai suhana jaanan

dil abhi Thik se TuTa bhi nahin hai mera

Thik se toD ke jaana ho to jaana jaanan

dagh chehre ke to dhul jate hain lekin ai 'bilal'

dagh daman pe na lag jae bachana jaanan