jalwa-gah-e-dahr mein husn-e-azal ki tarah

jalva-gah-e-dahr meñ husn-e-azal kī tarah

aap raheñge javāñ merī ġhazal kī tarah

uff ye hasīñ zāviye aap kī raftār ke

bahtī ho jaise nadī saañp ke bal kī tarah

raat kuchh aise khilī chāñdnī ehsās kī

tair ga.e aañkh meñ ashk kañval kī tarah

toḌ ke zindān-e-ġham log havā ho ga.e

maiñ huuñ asīr-e-vafā aaj bhī kal kī tarah

aap se milne ke baa'd saañs na lī jā sakī

dil meñ uThā dard sā radd-e-'amal kī tarah

shankh bajā yaad kā pankh lage soch ko

biite zamāne ka.ī uḌ ga.e pal kī tarah

dil meñ liye hasrateñ duur se dekhūñ 'qatīl'

ziist hai mere liye rāj-mahal kī tarah

jalwa-gah-e-dahr mein husn-e-azal ki tarah

aap rahenge jawan meri ghazal ki tarah

uff ye hasin zawiye aap ki raftar ke

bahti ho jaise nadi sanp ke bal ki tarah

raat kuchh aise khili chandni ehsas ki

tair gae aankh mein ashk kanwal ki tarah

toD ke zindan-e-gham log hawa ho gae

main hun asir-e-wafa aaj bhi kal ki tarah

aap se milne ke ba'd sans na li ja saki

dil mein uTha dard sa radd-e-'amal ki tarah

shankh baja yaad ka pankh lage soch ko

bite zamane kai uD gae pal ki tarah

dil mein liye hasraten dur se dekhun 'qatil'

zist hai mere liye raj-mahal ki tarah