rabt asiron ko abhi us gul-e-tar se kam hai

rabt asīroñ ko abhī us gul-e-tar se kam hai

ek raḳhna sā hai dīvār meñ dar se kam hai

harf kī lau maiñ udhar aur baḌhā detā huuñ

aap batlā.eñ to ye ḳhvāb jidhar se kam hai

haath duniyā kā bhī hai dil kī ḳharābī meñ bahut

phir bhī ai dost tirī ek nazar se kam hai

soch lo maiñ bhī huā chup to girāñ guzregā

ye añdherā jo mire shor o sharar se kam hai

vo bujhā jaa.e to ye dil ko jalā de phir se

shaam hī kaun sī rāhat meñ sahar se kam hai

ḳhaak itnī na uḌā.eñ to hameñ bhī 'bābar'

dasht achchhā hai ki vīrānī meñ ghar se kam hai

rabt asiron ko abhi us gul-e-tar se kam hai

ek raKHna sa hai diwar mein dar se kam hai

harf ki lau main udhar aur baDha deta hun

aap batlaen to ye KHwab jidhar se kam hai

hath duniya ka bhi hai dil ki KHarabi mein bahut

phir bhi ai dost teri ek nazar se kam hai

soch lo main bhi hua chup to giran guzrega

ye andhera jo mere shor o sharar se kam hai

wo bujha jae to ye dil ko jala de phir se

sham hi kaun si rahat mein sahar se kam hai

KHak itni na uDaen to hamein bhi 'babar'

dasht achchha hai ki virani mein ghar se kam hai