nasim-e-subh ye kya keh gai KHuda jaane

nasīm-e-sub.h ye kyā keh ga.ī ḳhudā jaane

chhalak rahe haiñ chaman meñ guloñ ke paimāne

guzar ga.ī jo chaman par vo koī kyā jaane

chhiḌe hue haiñ bahār-o-ḳhizāñ ke afsāne

jahāñ pe chāk-garebāñ bhī chāk-dil ban jaa.e

guzar rahe haiñ ab un manziloñ se dīvāne

zabān-e-shauq jinheñ keh sakī na tere huzūr

mire sukūt ne dohrā diye vo afsāne

mire laboñ kā tabassum to sab ne dekh liyā

jo dil pe biit rahī hai vo koī kyā jaane

nigāh-e-'ishq meñ dair-o-haram kī qaid nahīñ

kahīñ charāġh jale uḌ chaleñge parvāne

na e'tibār-e-nazāra na ishtiyāq-e-jamāl

Thahar ga.ī hai kahāñ zindagī ḳhudā jaane

faroġh-e-husn se hai garmī-e-vafā kitnī

ki ek sham' hai aur be-hisāb parvāne

mile bichhaḌ ke ik aisī bhī rāh-e-gardish meñ

hamārī 'umr ke sāthī hameñ na pahchāne

hameñ uThāne se pahle ye soch le saaqī

jahāñ pe rakkhe haiñ rakkhe raheñge paimāne

nasim-e-subh ye kya keh gai KHuda jaane

chhalak rahe hain chaman mein gulon ke paimane

guzar gai jo chaman par wo koi kya jaane

chhiDe hue hain bahaar-o-KHizan ke afsane

jahan pe chaak-gareban bhi chaak-dil ban jae

guzar rahe hain ab un manzilon se diwane

zaban-e-shauq jinhen keh saki na tere huzur

mere sukut ne dohra diye wo afsane

mere labon ka tabassum to sab ne dekh liya

jo dil pe bit rahi hai wo koi kya jaane

nigah-e-'ishq mein dair-o-haram ki qaid nahin

kahin charagh jale uD chalenge parwane

na e'tibar-e-nazara na ishtiyaq-e-jamal

Thahar gai hai kahan zindagi KHuda jaane

farogh-e-husn se hai garmi-e-wafa kitni

ki ek sham' hai aur be-hisab parwane

mile bichhaD ke ek aisi bhi rah-e-gardish mein

hamari 'umr ke sathi hamein na pahchane

hamein uThane se pahle ye soch le saqi

jahan pe rakkhe hain rakkhe rahenge paimane