humne tujh par koi ilzam nahin aane diya

ham ne tujh par koī ilzām nahīñ aane diyā

ik ġhazal meñ bhī tirā naam nahīñ aane diyā

tū ne ik din hameñ nākām kahā aur ham ne

ḳhud ko apne bhī kisī kaam nahīñ aane diyā

ik nishānī bhī farāmosh nahīñ kī us kī

ek bhī zaḳhm ko ārām nahīñ aane diyā

apnī palkoñ meñ chhupā.e rakhe aañsū apne

ik sitāra bhī lab-e-bām nahīñ aane diyā

zindagī is liye pur-kaif kaTī hai 'sarvar'

dil meñ andesha-e-anjām nahīñ aane diyā

hum ne tujh par koi ilzam nahin aane diya

ek ghazal mein bhi tera nam nahin aane diya

tu ne ek din hamein nakaam kaha aur hum ne

KHud ko apne bhi kisi kaam nahin aane diya

ek nishani bhi faramosh nahin ki us ki

ek bhi zaKHm ko aaram nahin aane diya

apni palkon mein chhupae rakhe aansu apne

ek sitara bhi lab-e-baam nahin aane diya

zindagi is liye pur-kaif kaTi hai 'sarwar'

dil mein andesha-e-anjam nahin aane diya