bol ke dekhiye andaz se khul jata hai

bol ke dekhiye andāz se khul jaatā hai

dil kā darvāza hai āvāz se khul jaatā hai

log sūrat se parakh lete haiñ sīrat kā mizāj

kyā hai anjām ye āġhāz se khul jaatā hai

dil kā jo haal hai vo tum ko batā.eñ kaise

raaz to raaz hai ham-rāz se khul jaatā hai

sab se khultā nahīñ ai dost ghaTāoñ kā bharam

ġhāliban gesū-e-shahnāz se khul jaatā hai

'ain mumkin hai javāñ 'ishq agar chāhe to

'uqda-e-husn baḌe naaz se khul jaatā hai

mutriba chheḌ sar-e-bazm koī taaza ġhazal

naġhma-e-'ishq fusūñ-sāz se khul jaatā hai

hausla chāhiye uḌne ke liye ai 'muztar'

par shikasta sahī parvāz se khul jaatā hai

bol ke dekhiye andaz se khul jata hai

dil ka darwaza hai aawaz se khul jata hai

log surat se parakh lete hain sirat ka mizaj

kya hai anjam ye aaghaz se khul jata hai

dil ka jo haal hai wo tum ko bataen kaise

raaz to raaz hai ham-raaz se khul jata hai

sab se khulta nahin ai dost ghaTaon ka bharam

ghaaliban gesu-e-shahnaz se khul jata hai

'ain mumkin hai jawan 'ishq agar chahe to

'uqda-e-husn baDe naz se khul jata hai

mutriba chheD sar-e-bazm koi taza ghazal

naghma-e-'ishq fusun-saz se khul jata hai

hausla chahiye uDne ke liye ai 'muztar'

par shikasta sahi parwaz se khul jata hai