tujhse milte hain to auqat mein aa jate hain

tujh se milte haiñ to auqāt meñ aa jaate haiñ

varna ham log to jazbāt meñ aa jaate haiñ

kaun jaane ki chamak in kī hai kis rang meñ qaid

aañkh se motī jo barsāt meñ aa jaate haiñ

dil ke ḳhush-hāl dikhāve ko rahā karte haiñ ḳhush

shaam Dhaltī hai to sadmāt meñ aa jaate haiñ

jam ga.e haiñ jo ka.ī jazbe badan ke andar

dekh kar tujh ko vo harkāt meñ aa jaate haiñ

rāteñ ro ro ke guzartī haiñ tire bin aur phir

din mire halqa-e-āfāt meñ aa jaate haiñ

log saare hī samajh-dār haiñ lekin 'aḳhtar'

ek ham haiñ jo tirī baat meñ aa jaate haiñ

tujh se milte hain to auqat mein aa jate hain

warna hum log to jazbaat mein aa jate hain

kaun jaane ki chamak in ki hai kis rang mein qaid

aankh se moti jo barsat mein aa jate hain

dil ke KHush-haal dikhawe ko raha karte hain KHush

sham Dhalti hai to sadmat mein aa jate hain

jam gae hain jo kai jazbe badan ke andar

dekh kar tujh ko wo harkat mein aa jate hain

raaten ro ro ke guzarti hain tere bin aur phir

din mere halqa-e-afat mein aa jate hain

log sare hi samajh-dar hain lekin 'aKHtar'

ek hum hain jo teri baat mein aa jate hain