aur kis ka ghar kushada hai kahan Thahregi raat

aur kis kā ghar kushāda hai kahāñ Thahregī raat

mujh ko hī mehmāñ-navāzī kā sharaf baḳhshegī raat

niiñd aa.egī na un be-ḳhvāb āñkhoñ meñ kabhī

mujh ko thapkī dete dete aap so jā.egī raat

shaam hargiz din ke siine meñ na ḳhanjar ghoñptī

ye agar mā'lūm hotā ḳhūñ-bahā māñgegī raat

āñsuoñ se tar-ba-tar ho jā.egā āñgan tamām

karb-e-tanhā.ī pe apne phuuT kar ro.egī raat

chāñd-tāroñ ko chhupā bhī leñ ghane bādal agar

jhilmilāte jugnuoñ se rāsta pūchhegī raat

apne apne lutf se donoñ navāzeñge mujhe

zaḳhm-e-dil baḳhshegā din us par namak chhiḌkegī raat

sūraj apne rath ko phir ākāsh par dauḌā.egā

sub.h kā taarā nikalte hī simaT jā.egī raat

jab tire juuḌe kā gajrā yaad aa.egā mujhe

rāt-kī-rānī ke phūloñ se mahak uTThegī raat

ghar palaT kar jā.ūñgā ruḳh par liye din-bhar kī dhuul

mujh ko ai 'ābid' baḌī mushkil se pahchānegī raat

aur kis ka ghar kushada hai kahan Thahregi raat

mujh ko hi mehman-nawazi ka sharaf baKHshegi raat

nind aaegi na un be-KHwab aankhon mein kabhi

mujh ko thapki dete dete aap so jaegi raat

sham hargiz din ke sine mein na KHanjar ghonpti

ye agar ma'lum hota KHun-baha mangegi raat

aansuon se tar-ba-tar ho jaega aangan tamam

karb-e-tanhai pe apne phuT kar roegi raat

chand-taron ko chhupa bhi len ghane baadal agar

jhilmilate jugnuon se rasta puchhegi raat

apne apne lutf se donon nawazenge mujhe

zaKHm-e-dil baKHshega din us par namak chhiDkegi raat

suraj apne rath ko phir aakash par dauDaega

subh ka tara nikalte hi simaT jaegi raat

jab tere juDe ka gajra yaad aaega mujhe

raat-ki-rani ke phulon se mahak uTThegi raat

ghar palaT kar jaunga ruKH par liye din-bhar ki dhul

mujh ko ai 'abid' baDi mushkil se pahchanegi raat