tarikiyan mili hain ujala mila nahin

tārīkiyāñ milī haiñ ujālā milā nahīñ

un se vafā kā koī natīja milā nahīñ

muusā huuñ aur mujh ko batāte haiñ rāste

vo log jin ko raah meñ dariyā milā nahīñ

kahne ko saikḌoñ mire hamdard haiñ magar

dil se maiñ keh sakūñ jise apnā milā nahīñ

ghere hue haiñ ranj-o-alam aur mushkilāt

har gaam par hai dard masīhā milā nahīñ

tūfān-e-muflisī meñ ghirā huuñ maiñ is qadar

kashtī-e-zindagī ko kinārā milā nahīñ

'dānish' talāsh chhoḌ do ab tum sukūn kī

sadiyāñ guzar ga.ī haiñ vo lamha milā nahīñ

tarikiyan mili hain ujala mila nahin

un se wafa ka koi natija mila nahin

musa hun aur mujh ko batate hain raste

wo log jin ko rah mein dariya mila nahin

kahne ko saikDon mere hamdard hain magar

dil se main keh sakun jise apna mila nahin

ghere hue hain ranj-o-alam aur mushkilat

har gam par hai dard masiha mila nahin

tufan-e-muflisi mein ghira hun main is qadar

kashti-e-zindagi ko kinara mila nahin

'danish' talash chhoD do ab tum sukun ki

sadiyan guzar gai hain wo lamha mila nahin