qismat ka likkha bhi kab miT paya hai

qismat kā likkhā bhī kab miT paayā hai

ham ne bhī ro ro kar kaam chalāyā hai

ham kyā jāneñ jannat kaisī hotī hai

us se pūchho jis ne tum ko paayā hai

ham se pūchho pyaar kī pitch ke pech-o-ḳham

ham ne sab se pahle wicket gañvayā hai

jis kī ḳhātir sab ilzām liye ḳhud par

us ne bhī ham par ilzām lagāyā hai

ik titlī ke uḌ jaane ke mātam meñ

jaane saarā gulshan kyuuñ murjhāyā hai

yuuñ to shahr-e-dil meñ bhiiḌ bahut hai par

us kī ab tak kaun jagah le paayā hai

hijr ke dīmak ne tan kā ye haal kiyā

mujh pe buḌhāpā 'umr se pahle aayā hai

us ke shahr se aane vaalī rail meñ 'harsh'

tanhā.ī meñ pahroñ vaqt bitāyā hai

qismat ka likkha bhi kab miT paya hai

hum ne bhi ro ro kar kaam chalaya hai

hum kya jaanen jannat kaisi hoti hai

us se puchho jis ne tum ko paya hai

hum se puchho pyar ki pitch ke pech-o-KHam

hum ne sab se pahle wicket ganwaya hai

jis ki KHatir sab ilzam liye KHud par

us ne bhi hum par ilzam lagaya hai

ek titli ke uD jaane ke matam mein

jaane sara gulshan kyun murjhaya hai

yun to shahr-e-dil mein bhiD bahut hai par

us ki ab tak kaun jagah le paya hai

hijr ke dimak ne tan ka ye haal kiya

mujh pe buDhapa 'umr se pahle aaya hai

us ke shahr se aane wali rail mein 'harsh'

tanhai mein pahron waqt bitaya hai